”დღეს უკვე ჩვენი კურორტები იძლევა საერთაშორისო დონის შეჯიბრებების ჩატარების შესაძლებლობას”, - აღნიშნულის შესახებ განცხადება საქართველოს პრემიერ-მინისტრმა პარლამენტში სამთავრობო პროგრამის წარდგენისას გააკეთა. ირაკლი ღარიბაშვილის თქმით, 2013 და 2014 წლებში ტურიზმიდან 3,5 მილიარდი დოლარი შემოვიდა საქართველოში, ზამთრის კურორტების ინფრასტრუქტურა კი კიდევ უფრო გვიმყარებს ოპტიმიზმის საფუძველს.
”პირველად საქართველოს სამთო კურორტების ისტორიაში მოხდა სათხილამურო ტრასების ხელოვნური გათოვლიანება გუდაურსა და ბაკურიანში. წელს პირველად ზამთრის ტურისტული სეზონის გახსნა აღარ იყო დამოკიდებული ამინდზე. სათხილამურო სეზონი გაიზარდა 5 თვემდე. დღეს უკვე ჩვენი კურორტები იძლევა საერთაშორისო დონის შეჯიბრებების ჩატარების შესაძლებლობას. უკვე წელს გუდაურში 40 პროცენტით, დიდველზე კი - 20 პროცენტით გაიზარდა ვიზიტორთა რაოდენობა.
მე მესმის, რომ შეიძლება ჩვენი ოპონენტებისთვის ამის მოსმენა არ იყოს სასიამოვნო სუბიექტური მიზეზის გამო, მაგრამ ეს არის რეალობა. მთავარი ის არის, რომ ეს წარმატება ჩვენი ქვეყნისთვის არის ძალიან მნიშვნელოვანი”,- განმარტა ღარიბაშვილმა.
