”2014 წელს, 2013 წელთან შედარებით, პირდაპირი უცხოური ინვესტიციების მოცულობა გაიზარდა, და ეს ნამდვილად არის მნიშვნელოვანი მიღწევა იმ ურთულესი ფონის გათვალისწინებით, რომელიც რეგიონში შეიქმნა”, აღნიშნა საქართველოს პრემიერ-მინისტრმა პარლამენტში სამთავრობო პროგრამის წარდგენისას.
ირაკლი ღარიბაშვილის განმარტებით, პირდაპირი უცხოური ინვესტიციების მოცულობამ გასულ წელს მილიარდ 272 მილიონი დოლარი შეადგინა, რაც 35 პროცენტით აღემატება 2013 წლის მონაცემებს. ამავე პერიოდში რეინვესტიციის ოდენობამ მთლიანი პირდაპირი უცხოური ინვესტიციების 21 პროცენტი შეადგინა. ეს უმნიშვნელოვანესი პარამეტრია ქვეყნის მომავალი განვითარებისათვის.
”2014 წელს შემოსული პირდაპირი უცხოური ინვესტიციების მაჩვენებელი არის ყველაზე მაღალი 2007 წლის მაჩვენებლის შემდეგ;
ასევე, 2013 წელთან შედარებით 78 პროცენტით გაიზარდა ამერიკის შეერთებული შტატებიდან შემოსული პირდაპირი ინვესტიციები;
სულ ახლახან დაიწყო შაჰდენიზის პროექტის მეორე ფაზა, რაც საქართველოს 2 მილიარდი დოლარის ინვესტიციას მოუტანს.
აქვე აღსანიშნავია, რომ 2014 წელს, 2012 წელთან შედარებით, ექსპორტი გაიზარდა 20.5 პროცენტით, ევროკავშირთან - 76 პროცენტით, რუსეთთან კი - დაახლოებით 6-ჯერ (487.5 პროცენტით)”, - განმარტა ირაკლი ღარიბაშვილმა.
