საქართველოს პრემიერ-მინისტრის განმარტებით, 2015 წლის პირველი კვარტალის მონაცემებმა გვაჩვენა, რომ ბიუჯეტი გადაჭარბებით სრულდება. ირაკლი ღარიბაშვილმა პარლამენტში სამთავრობო პროგრამის წარდგენისას განაცხადა, რომ პირველი კვარტალის მონაცემებით, შემოსავლებმა გეგმას 140 მილიონი ლარით გადააჭარბა, რაც ეფუძნება ეკონომიკური აქტივობის მოსალოდნელზე მაღალ დონეს. მარტში 12.5 პროცენტით არის გაზრდილი დღგ-ს გადამხდელ საწარმოთა ბრუნვა.
”2014 წელს პროდუქციის გამოშვება სამეწარმეო სექტორში გაიზარდა 12.8 პროცენტით, ხოლო ბიზნესსექტორში დასაქმებულთა რაოდენობა - 11 ათასი ადამიანით.
სამშენებლო სექტორის აქტივობა 2014 წელს 2013 წელთან შედარებით გაზრდილია 20 პროცენტით;
მიუხედავად იმისა, რომ საქართველოში სხვა ქვეყნებთან შედარებით რეგიონის მასშტაბით უკეთესი ვითარებაა, მთავრობის ეკონომიკური პოლიტიკა როგორც მოკლე, ისე საშუალოვადიან პერიოდში მიმართულია ეკონომიკური ზრდის დაჩქარებისკენ. ჩვენი მიზანია ხელი შევუწყოთ ქვეყანაში თავისუფალი მეწარმეობის განვითარებას, ადმინისტრაციული და, ზოგიერთ შემთხვევაში, ფინანსური მხარდაჭერის, სპეციალური პროექტების გზით”, აღნიშნა პრემიერ-მინისტრმა პარლამენტში სამთავრობო პროგრამის წარდგენისას.
