ვიცე-პრემიერის გიორგი კვირიკაშვილის განმარტებით, ევროკავშირი ახალი სამწლიანი პროგრამის ფარგლებში 44.5 მილიონ ევროს გამოყოფს, რომელიც ქვეყანას DCFTA-ის განხორციელებაში და ამ პროცესში მცირე და საშუალო ბიზნესის ხელშეწყობაში დაეხმარება. საქართველოს ვიცე-პრემიერმა, გიორგი კვირიკაშვილმა პარლამენტში საკომიტეტო მოსმენაზე სიტყვით გამოსვლისას განსაკუთრებული მნიშვნელობა მიანიჭა აშშ-სთან თავისუფალი ვაჭრობის შეთანხმებაზე მოლაპარაკების დაწყების შესაძლებლობას. კვირიკაშვილის თქმით, ამ მიზნით, ორ ქვეყანას შორის შეიქმნა ვაჭრობასა და ინვესტიციებზე მაღალი დონის დიალოგის ფორმატი, რომლის ფარგლებშიც საქართველოში უკვე ჩატარდა მისიის შეხვედრა.
მინისტრმა ასევე განმარტა, რომ ივნისის ბოლოს გაიმართება მისი ვიზიტი აშშ-ში, რომლის ფარგლებშიც დაგეგმილია მორიგი შეხვედრის გამართვა აშშ-ის სავაჭრო წარმომადგენლებთან. მისი განცხადებით, ასევე, მიმდინარეობს ინტენსიური მუშაობა ორმხრივი სავაჭრო მისიების ორგანიზებაზე. აღსანიშნავია, რომ აშშ-ს მისია აპრილში იყო ჩამოსული საქართველოში. მისიაში წარმოდგენილი იყვნენ უმსხვილესი ამერიკული კომპანიები, რომლებიც დაინტერესებულნი არიან საქართველოში ბიზნესის წარმოებით. მიმდინარე წელს იგეგმება საქართველოს სავაჭრო მისიის განხორციელება აშშ-ში
შეხვედრაზე ასევე განიმარტა, რომ ამ დროისათის ინვესტიციების ორმხრივი დაცვის მექანიზმების ამოქმედების შესახებ მოლაპარაკება 31 ქვეყანასთან მიმდინარეობს. კვირიკაშვილის თქმით, საქართველოს ეკონომიკისა და მდგრადი განვითარების სამინისტრო, საერთაშორისო საფინანსო კორპორაციასთან ერთად, ინვესტიციების ხელშეწყობის კანონმდებლობის ცვლილებაზე მუშაობს. მინისტრის განცხადებით, განახლდა 31 ქვეყანასთან მოლაპარაკება ინვესტიციების ორმხრივი დაცვის მექანიზმების ამოქმედების შესახებ.
