”მიგვაჩნია, რომ ანაკლიის ახალი ნავსადგურის დღეს არსებული კონცეფციით აშენება საქართველოს ევრაზიულ ლოგისტიკურ ჰაბად გარდაქმნის აუცილებელ წინაპირობას წარმოადგენს”, აღნიშნა საქართველოს პრემიერ-მინისტრმა საპარლამენტო უმცირესობასთან შეხვედრისას.
ირაკლი ღარიბაშვილის თქმით, ლაზიკის პორტი, რომლის მშენებლობაც იგეგმებოდა გასულ წლებში, გათვლილი იყო შედარებით ნაკლები მოცულობის ტვირთებზე.
”ამასთან, პორტს არ ჰქონდა შემდგომი განვითარების პერსპექტივა. ჩვენ განვახორციელეთ საქართველოს სატრანზიტო პოტენციალისა და ახალი გეოპოლიტიკური რეალობიდან გამომდინარე წარმოქმნილი შესაძლებლობების კომპლექსური ანალიზი. ასევე, ჩატარდა დეტალური კვლევა ახალი ნავსადგურის მშენებლობისათვის ყველაზე ოპტიმალური ადგილმდებარეობის შესარჩევად. შედეგად, მივიღეთ გადაწყვეტილება ბევრად მაღალი გამტარუნარიანობის პორტის მშენებლობის შესახებ. ანაკლიის პორტი აშენდება 7 ფაზად და საბოლოოდ მისი გამტარუნარიანობა 100 მილიონ ტონას მიაღწევს. ჩვენი მიზანია არა მარტო რეგიონის ქვეყნების ბაზარი, არამედ ჩინეთიდან ტვირთნაკადების მოზიდვა, მით უმეტეს, რომ საქართველოს გეოგრაფიული მდებარეობა ამის ძალიან კარგ შესაძლებლობას იძლევა. აღსანიშნავია, რომ ნავსადგურის მიმდებარე ტერიტორიაზე იგეგმება თავისუფალი ინდუსტრიული ზონის შექმნა, რაც ხელს შეუწყობს ლოგისტიკური ბიზნესისა და ინდუსტრიული კლასტერის ჩამოყალიბებას”, - აღნიშნა ღარიბაშვილმა
