19 მაისს, საქართველოს ავსტრიის რესპუბლიკის პრეზიდენტი ჰაინც ფიშერი ბიზნეს დელეგაციასთან ერთად ეწვევა. საქართველოს სავაჭრო-სამრეწველო პალატის ინფორმაციით, 19 მაისს, სასტუმრო „თბილისი მარიოტში“ 09:30 საათზე საქართველო-ავსტრიის ბიზნეს ფორუმი გაიმართება. ავსტრიული დელეგაციის მიზანია ფორუმის ფარგლებში საქართველოს საინვესტიციო გარემოს შესწავლა და სავაჭრო-საინვესტიციო ურთიერთობების დამყარება. მათი ინტერესების სფეროებია: ენერგეტიკა, ელექტრომექანიკური მოწყობილობები, ტრანსპორტი და ლოჯისტიკა, მშენებლობა და სამშენებლო მასალები, განათლება, ხორცისა გადამამუშავებელი მრეწველობა, სოფლის მეურნეობა, ინფრასტრუქტურა, საკონსულტაციო სექტორი, განათება, სახანძრო სისტემები, მანქანების ლიზინგი, ხელოვნური თოვლის სისტემები, გათბობისა და ვენტილაციის სისტემები, სერვისები, და სხვა.
ფორუმზე დამსწრე აუდიტორიას სიტყვით მიმართავენ საქართველოს პრემიერ-მინისტრი ირაკლი ღარიბაშვილი, ავსტრიის პრეზიდენტი ჰაინც ფიშერი, საქართველოს სავაჭრო-სამრეწველო პალატის პრეზიდენტი კახა ბაინდურაშვილი, ავსტრიის ეკონომიკური პალატის ვიცე-პრეზიდენტი რიჩარდ შენცი და სავაჭრო მრჩეველი ანკარაში კონსტანტინ ბეკოსი.
ფორუმის ფარგლებში გაიმართება სექტორული პრეზენტაციები საქართველოში არსებული საინვესტიციო კლიმეტის შესახებ. აგრეთვე, მონაწილე კომპანიების წარმომადგენლებს შესაძლებლობა ექნებათ პირისპირ შეხვდნენ შესაბამისი ავსტრიული კომპანიების ხელმძღვანელებს.
