რამდენიმე დღეში საქართველო ევროპული ბიზნესის ეპიცენტრი გახდება, - ეს განცხადება საქართველოს პრემიერ-მინისტრმა EBRD-ის ყოველწლიური შეხვედრისა და ბიზნესფორუმის უზრუნველმყოფი სამთავრობო კომისიის სხდომაზე გააკეთა.
ირაკლი ღარიბაშვილმა კიდევ ერთხელ გაუსვა ხაზი ღონისძიების მნიშვნელობას, რომელსაც 14-15 მაისს, კავკასიაში პირველად, საქართველო უმასპინძლებს.
„ეს უაღრესად მნიშვნელოვანია ჩვენი ქვეყნის ცნობადობის გაზრდის თვალსაზრისით. ევროპის განვითარებისა და რეკონსტრუქციის ბანკი ჩვენი მნიშვნელოვანი პარტნიორია, როგორც ფინანსური თანამშრომლობის კუთხით, ისე ევროპასთან ურთიერთობის განვითარების მიმართულებით. ჩვენთვის საამაყოა, რომ ამ ღონისძიების საქართველოში ჩატარება განაპირობა განხორციელებულმა რეფორმებმა, დემოკრატიის განვითარების კუთხით გადადგმულმა ნაბიჯებმა, ინფრასტრუქტურის, ტრანსპორტის, ლოგისტიკისა და ენერგეტიკის სექტორებში არსებულმა პოტენციალმა“, - განაცხადა პრემიერმა და EBRD-ის მმართველთა საბჭოს ნდობისთვის მადლობა გადაუხადა.
მთავრობის მეთაურმა აღნიშნა, რომ ფორუმის მაღალ დონეზე გამართვისთვის მიმდინარე სამუშაოები დასასრულს უახლოვდება. ირაკლი ღარიბაშვილი იმედოვნებს, რომ ღონისძიების ფარგლებში გამართული შეხვედრები ქვეყნის განვითარებას და ეკონომიკურ წინსვლას შეუწყობს ხელს.
