ბათუმში გმირთა ხეივნის ტერიტორიაზე არსებული მიწის ნაკვეთების პრივატიზება უახლოეს პერიოდში დაიწყება. აჭარის ფინანსთა და ეკონომიკის სამინისტრო ელექტრონულ აუქციონს 4 საპრივატიზაციო მიწის ნაკვეთზე გამოაცხადებს.სასტუმრო „რადისონში“გმირთა ხეივნის ტერიტორიით დაინტერესებულ ინვესტორებთან შეხვედრა გაიმართა.
რეგიონში სხვადასხვა სექტორში მოქმედ ინვესტორებს ხეივნის საინვესტიციო წინადადებები და სამშენებლო რეგულაციები აჭარის ფინანსთა და ეკონომიკის სამინისტროს წარმოამადგენლებმა გააცნეს. ბიზნეს წრეების წარმომადგენლები დეტალურად გაეცნენ ინფორმაციას,გმირთა ხეივნის დაგეგმარების მიხედვით, კონკრეტულად რა ინვესტიციის განხორციელებაა შესაძლებელი. ინვესტორებთან შეხვედრა კითხვა-პასუხის ფორმატით წარიმართა. შეხვედრას აჭარის ფინანსთა და ეკონომიკის მინისტრი დავით ბალაძე ესწრებოდა.
გმირთა ხეივნის განვითარების კონცეფციაზე აჭარის ფინანსთა და ეკონომიკის სამინისტრომ იმუშავა. ტერიტორიის ფართობი 3 ჰა. დაგეგმარების მიხედვით ხეივანი 14 საინვესტიციო მიწის ნაკვეთად დაიყო,რომლის ათვისება 3 ეტაპად განხორციელდება.
კონცეფციის მიხედვით შენობის მაქსიმალური სიმაღლე 140, ხოლო მინიმალური 30 მეტრი განისაზღვრა. ტერიტორიაზე სასტუმროების, აპარტამენტების, რესტორნების, სხვადასხვა გასართობი ობიექტებისა და სპორტული ცენტრების განთავსება იქნება შესაძლებელი. გმირთა ხეივნის განვითარების კონცეფციის მიზანი საინვესტიციო გარემოს გაუმჯობესება, ბიზნესის/ტურიზმის ხელშეწყობა,სამუშაო ადგილების შექმნა და ქალაქის ინფრასტრუქტურის განვითარებაა.
