თურქეთს მალე ახალი აეროპორტი შეემატება. ქვეყნის ჩრდილო-აღმოსავლეთით, პროვინცია ორდუში 22 მაისს ახალი აეროპორტი გაიხსნება, იტყობინება Anadolu.
აღნიშნული აეროპორტი ძირითადად შიდა რეისებს მოემსახურება.
თურქეთში ამ დროისათვის 69 აეროპორტი ფუნქციონირებს, საიდანაც 21 საერთაშორისო აეროპორტია, ხოლო 31 აეროპორტის გამოყენება კი ძირითადად შიდა რეისებისათვის ხდება. დარჩენილი 17 აეროპორტი კი სამხედრო აეროპორტს წარმოადგენს.
იმავდროულად თურქეთში, დამატებით 6 ახალი აეროპორტი შენდება.
ივნისში კი სტამბულში რიგით მესამე აეროპორტის მშენებლობის დაწყების ცერემონიაც გაიმართება. როგორც ცნობილია სტამბულს ამ დროისათვის ორი: ათათურქის სახელობის საერთაშორისო აეროპორტი და საბიჰას საერთაშორისო აეროპორტი ემსახურება. სტამბულის ახალი აეროპორტის მშენებლობის შესახებ გადაწყვეტილება ჯერ კიდევ 2013 წელს იქნა მიღებული. აეროპორტის მშენებლობის ტენდერი "Limak-Kolin-Cengiz-MaPa-Kalyon"-მა მოიგო, რომელმაც პროექტი 22,1 მლრდ დოლარად შეაფასა. აღნიშნული აეროპორტი თავდაპირველად წელიწადში 90 მლნ მგზავრს მოემსახურება, ხოლო შემდგომ გამტარუნარიანობა 150 მლნ მგზავრამდე გაიზრდება.
სტამბულში მესამე აეროპორტი, რომელიც ტერკოსის ტბის მიმდებარედ აშენდება, მსოფლიოში ერთ-ერთი უდიდესი აეროპორტი იქნება და ის თურქეთის პრეზიდენტის, რეჯებ ტაიპ ერდოღანის სახელობის იქნება.
