2 მაისს, ბაქოში ვიზიტის ფარგლებში, ფინანსთა მინისტრი ნოდარ ხადური შეხვდა აზიის განვითარების ბანკის პრეზიდენტს ტაკეჰინო ნაკაოს.
ფინანსთა მინისტრმა აზიის განვითარების ბანკის პრეზიდენტს მადლობა გადაუხადა იმ დახმარებისთვის, რომელსაც ADB-ი იჩენს საქართველოს მიმართ და იმედი გამოთქვა, რომ ეს დახმარება მომავალშიც გაგრძელდება.
„აზიის განვითარების ბანკი საქართველოს ერთ-ერთი ყველაზე სანდო და მნიშვნელოვანი პარტნიორია. ბანკის მხარდაჭერით, ქვეყანაში ხორციელდება პროექტები როგორც საჯარო, ისე კერძო სექტორში. ჩვენ ვთანამშრომლობთ ისეთი მიმართულებებით, როგორიცაა: გზების მშენებლობა, წყალმომარაგება, ნაპირსამაგრი სამუშაოები. დარწმუნებული ვარ, მომავალში ჩვენი პარტნიორობა წარმატებით გაგრძელდება,“ - განაცხადა ფინანსთა მინისტრმა ნოდარ ხადურმა.
შეხვედრაზე განიხილეს საქართველოში აზიის განვითარების ბანკის მხარდაჭერილი ისეთი გრძელვადიანი საინვესტიციო პროექტები როგორიცაა სხვადასხვა ქალაქებში წყალმომარაგების სისტემების სარეაბილიტაციო და კანალიზაციის მშენებლობის სამუშაოები, ინფრასტრუქტურული პროექტები, მათ შორის, თბილისი-რუსთავის დამაკავშირებელი ავტომაგისტრალის (მეორე მონაკვეთი) მოდერნიზაციის სამუშაოები, ანაკლიის ნაპირდაცვის ღონისძებები და სხვა.
დღესვე, ფინანსთა მინისტრი აზიის განვითარების ბანკის ცენტრალური და დასავლეთ აზიის დეპარტამენტის გენერალურ დირექტორს კლაუს გერჰოიზერს შეხვდა. შეხვედრაზე განიხილეს რეგიონში, მათ შორის, საქართველოში არსებული ეკონომიკური ვითარება და ორმხრივი თანამშრომლობის საკითხები.
