ბიზნესასოციაციის პრეზიდენტი გიორგი ჭირაქაძე მთავრობას და ეროვნულ ბანკს ლარის კურსთან დაკავშირებით, მეტი აქტიურობისა და თანამშრომლობისკენ მოუწოდებს.
ჭირაქაძე დარწმუნებულია, რომ აღმასრულებელი ხელისუფლება და ეროვნული ბანკი, ცალ-ცალკე ბევრს ცდილობენ და აკეთებენ, მაგრამ კოორდინაციის გარეშე შედეგის მიღწევა შეუძლებელია.
„ძალიან მნიშვნელოვანია, რომ აღმასრულებელი ხელისუფლება და ეროვნული ბანკი ერთად მუშაობდეს ძალიან აქტიურად. ცალ-ცალკე ვერც ხელისუფლება და ვერც ეროვნული ბანკი ვერაფერს გააკეთებს. ფაქტობრივად, ეს შეუძლებელია. ყველას თავისი მექანიზმები აქვს. ჩემი აზრით, ისინი საკმარისად არ მუშაობენ ერთად და ჩვენ მოვუწოდებთ მათ, უფრო აქტიურტად ითანამშრომლონ“, - განაცხადა ჭირაქაძემ.
მისივე თქმით, შეუძლებელია თუნდაც აქტიურმა მუშაობამ უზრუნველყოს ლარის კურსის 2-ზე ან 1.8-ზე ჩამოყვანა.
„როდესაც მეტი კოორდინაციაა და მეტად ერთად მუშაობენ, ბევრი საკითხები, ფაქტორები, რომელიც ეკონომიკაში დგას, მათზე რეაგირება, გადაწყვეტა უფრო აქტიურად, სწრაფად ხდება. დარწმუნებული ვარ, როგორც აღმასრულებელი ხელისუფლება, ისევე ეროვნული ბანკი, ცალ-ცალკე ძალიან ბევრს ცდილობენ და აკეთებენ, მაგრამ ჩემი აზრით, ის კოორდინაცია, რაც მნიშვნელოვანია, რომ ჩვენ, როგორც ბიზნესმა უნდა დავინახოთ, კარგად ვერ ვხედავთ. აქტიური მუშაობით ბევრი რაღაცის გაკეთება შეიძლება, მაგრამ ეს რასაკვირველია, არ უზრუნველყოფს იმას, რომ ლარის კურსი 2-ზე ან 1.8-ზე ჩამოვიდეს“, - განაცხადა ბიზნესასოციაციის პრეზიდენტმა.
