დღეისათვის იმერეთის რეგიონში მიმდინარე საინვესტიციო პროექტების ჯამური ღირებულება 29 მლნ ლარამდეა. როგორც პრემიერ-მინისტრმა, ქუთაისში „ძლიერი რეგიონი - ძლიერი საქართველოსთვის“ პრეზენტაციისას განმარტა, ეს ინვესტიციები ჩაიდო ქუთაისსა და ზესტაფონში - „სმარტისა“ და ცნობილი ბრენდის სწრაფი კვების ობიექტის ამუშავებაში, გასამართ სადგურებში, სამშენებლო მასალების წარმოებაში, სასათბურე მეურნეობაში, მეორადი პლასტმასების გადასამუშავებელი ქარხნის მშენებლობაში და ა.შ. ეს ინვესტიციები მეტყველებს იმაზე, რომ ჩვენ ვქმნით აბსოლუტურად საიმედო გარემოს ბიზნესისათვის.
„მე მინდა მოვუწოდო ჩვენს ბიზნესმენებს, რომ დაინტერესდნენ ამ შესანიშნავი მხარით და აქ განახორციელონ მათთვის საინტერესო ბიზნესპროექტები.
2013 წელს იმერეთის რეგიონში 60 მილიონ დოლარამდეპირდაპირი უცხოური ინვესტიცია შემოვიდა, 2014 წელს კი - 23 მილიონ დოლარამდე.ეს ინვესტიციები ჩაიდო გადამმუშავებელ მრეწველობაში, მშენებლობაში, უძრავ ქონებაში, სამთომოპოვებით მრეწველობაში, ჯანდაცვისა და სოციალური დახმარების მიმართულებით, სასტუმროებსა და რესტორნებში, სოფლის მეურნეობაში, თევზჭერაში.
ჩვენ, პრაქტიკულად, უწყვეტ რეჟიმში ვმუშაობთ იმისათვის, რომ ქუთაისმა დაიბრუნოს ის უმნიშვნელოვანესი როლი, რომელსაც იგი ათეული წლების განმავლობაში ასრულებდა საქართველოს ეკონომიკაში. მინდა გითხრათ, რომ საქართველოს მთავრობამ ცოტა ხნის წინ მიიღო დადგენილება ქუთაისის ჰუალიგის თავისუფალი ინდუსტრიული ზონის შექმნის შესახებ. საუბარია 2020 წლამდე 30 მილიონი დოლარის ინვესტიციის განხორციელებაზე. ეს გახლავთ 30-წლიანი პროექტი. მე მაქვს დიდი იმედი იმისა, რომ მალე ქუთაისში მთლიანად შეიცვლება განვითარების ტემპი და ჩვენ რამდენიმე წელიწადში გვექნება თანამედროვე ინდუსტრიული ზონა, რომელიც მნიშვნელოვნად აამაღლებს ცხოვრების დონეს რეგიონში და დიდ გავლენას მოახდენს ქვეყნის ეკონომიკაზე“, აღნიშნა ღარიბაშვილმა.
