ბათუმის საერთაშორისო აეროპორტში მგზავრების 32 %-ით შემცირდა. ეკონომიკისა და მდგრადი განვითარების სამინისტროში შემცირების მიზეზებს ხსნიან და აცხადებენ, რომ ეს განპირობებულია იმით, რომ 2014 წლისგან განსხვავებით, 2015 წლის ზამთრის სეზონზე ავიაკომპანია Pegasus-ს არ შეუსრულებია ფრენები ბათუმსა და თურქეთის პუნქტებს შორის, ხოლო ავიაკომპანია Georgian Airways-ს - ერაყის მიმართულებით. „2014 წლის I კვარტლის განმავლობაში აღნიშნული ავიაკომპანიების მიერ გადაყვანილი მგზავრების რაოდენობა შეადგენდა 9 987 მგზავრს (Pegasus - 9 522 მგზავრი, ხოლო Georgian Airways - 465 მგზავრი)“, აღნიშნავენ ეკონომიკისა და მდგრადი განვითარების სამინისტროში. მიუხედავად იმისა, რომ პირველი კვარტლის მონაცემები უარყოფითია, სამინისტროში მიაჩნიათ, რომ წლის ბოლომდე აეროპორტი უფრო მეტ მგზავრს გაატარებს, ვიდრე ეს 2014 წელს მოახერხა. „წლის ბოლომდე მნიშვნელოვან ზრდას ველოდებით მგზავრთნაკადის კუთხით, რაც დააკომპენსირებს ზემოთაღნიშნულ შემცირებას. 2015 წლიდან საქართველოსა და მსოფლიოს სხვადასხვა ქვეყნებს შორის ახალი ავიარეისების განხორციელება დაიწყება, რაზეც საქართველოს ეკონომიკისა და მდგრადი განვითარების სამინისტრო, მის შესაბამის უწყებებთან ერთად აქტიურად მუშაობს“, - აცხადებენ ეკონომიკისა და მდგრადი განვითარების სამინისტროში. შეგახსენებთ, რომ სამოქალაქო ავიაციის სააგენტოს ინფორმაციით, 2015 წლის იანვარ-მარტში ბათუმის საერთაშორისო აეროპორტი 21 230 მგზავრს მოემსახურა, ეს იმ ფონზე, როდესაც აეროპორტმა გასული წლის ანალოგიურ პერიოდში 31 006 მგზავრი გაატარა. შესაბამისად, ბათუმის საერთაშორისო აეროპორტში წელს მგზავრთნაკადი 32 %-ით არის შემცირებული. სტატისტიკური ინფორმაციის მიხედვითვე, 2015 წლის პირველ კვარტალში, 2013 წლის პირველ კვარტალთან შედარებით ბათუმის საერთაშორისო აეროპორტში მგზავრთნაკადი 20 %-ითაა შემცირებული.
