საპარტნიორო ფონდი ექსპორტის ხელშემწყობი სააგენტოს ფორმირებაზე მეწარმეობის განვითარების სააგენტოსთან ერთად იმუშაობს.
23 აპრილს 17:00 საათზე, საპარტნიორო ფონდმა ექსპორტის ხელშეწყობის ცნობილ იტალიურ სააგენტო „საჩესთან“ (SACE) ხელშეკრულება გააფორმა და მომდევნო სამი თვის განმავლობაში მასთან ერთად ექსპორტის სააგენტოს სტრუქტურის ჩამოყალიბებასა და იმ პროდუქტებისა და პროცედურების შექმნაზე იმუშავებს, რომელიც ხელს შეუწყობს ექსპორტიორების ფინანსირებას.
საპარტნიორო ფონდი ექსპორტის ხელშემწყობი სააგენტოს ფორმირებაზე მეწარმეობის განვითარების სააგენტოსთან ერთად მუშაობს. მეწარმეობის განვითარების სააგენტო გახლავთ პირველი სახელმწიფო უწყება, რომელიც მთლიანად ორიენტირებულია სამეწარმეო გარემოს გაუმჯობესებაზე, კერძო სექტორის განვითარებაზე, მცირე და საშუალო საწარმოების და ექსპორტის ხელშეწყობაზე. სააგენტო ახორციელებს სახელმწიფო პროგრამა „აწარმოე საქართველოში“, რომელიც გახლავთ საქართველოს პრემიერ-მინისტრის, ირაკლი ღარიბაშვილის ინიციატივა და მიმართულია წარმოების წახალისებაზე და მცირე და საშუალო ბიზნესის ეფექტიანობის და კონკურენტუნარიანობის ზრდაზე.
ხელშეკრულების გაფორმების ცერემონიას ასევე დაესწრნენ ეკონომიკისა და მდგრადი განვითარების მინისტრი გიორგი კვირიკაშვილი და საქართველოში იტალიის საგანგებო და სრულუფლებიანი ელჩი ფედერიკა ფაბი. გიორგი კვირიკაშვილის განცხადებით, ექსპორტზე ორიენტირებული კომპანიების დახმარების მიზნით სამინისტრო და ფონდი მჭიდროდ იმუშავებენ. „საპარტნიორო ფონდს გააჩნია სწორედ ის პოტენციალი, რომლითაც შესაძლებელია ასეთი ტიპის სტრუქტურის სააგენტოს ჩამოყალიბება. ფონდის გამოცდილება და რესურსების მოზიდვის დიდი შესაძლებლობები ამის გარანტიას იძლევა,“ განაცხადა გიორგი კვირიკაშვილმა.
ექსპორტის ხელშეწყობის სააგენტოს მიზანია ხელი შეუწყოს ექსპორტიორს სხვადასხვა ფინანსური მექანიზმების გამოყენებით, მათ შორის განიხილება ექსპორტის საკრედიტო დაზღვევა, ფინანსური გარანტიების გაცემა ექსპორტიორ კომპანიებზე, საკრედიტო დავალიანების მართვა და სხვა მსოფლიო პრაქტიკაში აპრობირებული მეთოდები. კომპანია „საჩე“ რეკომენდაციას გაუწევს საპარტნიორო ფონდს, თუ რომელი მექანიზმი და რა ფორმით უფრო შეესაბამება საქართველოს რეალობას. შედეგად ექსპორტიორის ინტერესები საერთაშორისო ბაზრებზე უფრო დაცული იქნება, გაიზრდება მათი კონკურენტუნარიანობა და ფინანსებზე ხელმისაწვდომობა.
სააგენტო ექსპორტიორ კომპანიებს საშუალებას მისცემს, მოიპოვონ ფინანსირება ადგილობრივი ოპერაციებისთვისაც საექსპორტო ბაზრის გასაფართოებლად და განავითარონ ექსპორტის შესაძლებლობები.
საჩე, საპარტნიორო ფონდს გაუწევს საკონსულტაციო მომსახურებას და შესთავაზებს ტექნიკურ პროგრამას, რომელიც ორიენტირებულია პროდუქტებზე, პროცესების მართვის და რისკის შეფასებაზე. პროექტის მიზანია ახლად ჩამოყალიბებულ სააგენტოს გადასცეს ეფექტური ინსტრუმენტები და ინოვაციები, რათა იგი ფუნქციონირებადი გახდეს.
ექსპორტის ხელშემწყობის სააგენტო საპარტნიორო ფონდის ბაზაზე ჩამოყალიბდება.
