სადაზღვეო კომპანია ”ჯიპიაი ჰოლდინგი” არასამთავრობო ორგანიზაციებთან ერთად ეკოკამპანიას იწყებს და ქმნის ”ეკოისტების მოძრაობას”, რომელშიც ერთიანდება ყველა, ვინც იზიარებს ეკო-ზრუნვის აუცილებლობას.
როგორც ”ჯიპიაი ჰოლდინგის” საზოგადოებასთან ურთიერთობის სამსახურის უფროსმა თინათინ სტამბოლიშვილმა განმარტა, კამპანიის პირველი ეტაპის მიზანია, მოხდეს ამ გამოწვევის შესახებ უფრო მეტი ადამიანის ინფორმირება და ”ეკომეგობრული” ავტომობილებისათვის წამახალისებელი ინიციატივების დანერგვა, როგორც კერძო, ისე სამთავრობო დონეზე.
აღსანიშნავია, რომ კამპანიის ფარგლებში ”ჯიპიაი ჰოლდინგი” მომხმარებელს თვისობრივად ახალ ავტოდაზღვევას - ”ეკოპოლისს” სთავაზობს. პროდუქტი ”ეკოპოლისი” იმ მანქანებისთვისაა განკუთვნილი, რომლებიც ნაკლებად აბინძურებენ გარემოს.
”ჩვენი კამპანია ხორციელდება იმ არასამთავრობო ორგანიზაციებთან ერთად, რომლებიც ამ პრობლემატიკაზე მუშაობენ და უშუალოდ არიან ჩართულნი. რამდენიმე ინიციატივა გვაქვს. ჩვენი ერთ-ერთი მიზანია ის, რომ მოვახდინოთ საზოგადოების ინფორმირებულობა და წავახალისოთ ”ეკომეგობრული” ავტომობილები, ვინაიდან ჰაერის დაბინძურების მთავარი პრობლემა არის სწორედ ავტომობილებიდან გამონაბოლქვი. ამას კი თავის მხრივ ბევრი მიზეზი აქვს. გვსურს, რომ მეტმა მძღოლმა დაიცვას ეკო-მართვის წესები, რაც მათ საწვავის მინიმუმ 20 %-ით დაზოგვის საშუალებას მისცემს და ამასთან ერთად, ვთავაზობთ მართლაც უპრეცედენტო პირობებს იმ სტანდარტების ავტომობილებს, რომლებიც მეტ-ნაკლებად ახალია და ნაკლებად აბინძურებს გარემოს”, აღნიშნა ”ჯიპიაი ჰოლდინგის” საზოგადოებასთან ურთიერთობის სამსახურის უფროსმა თინათინ სტამბოლიშვილმა.
სადაზღვეო კომპანიის ინფორმაციით, ”ეკოპოლისით” ავტოდაზღვევის მსურველები მიიღებენ გაცილებით შეღავათიან ტარიფს - სტანდარტულ ტარიფთან შედარებით 20 %-ით ნაკლებს და ჩაერთვებიან მასშტაბურ გათამაშებაში, სადაც ყოველი მეათე დაზღვეული მიმზიდველ პრიზს იგებს. მათთვის განკუთვნილია ასევე გარანტირებული საჩუქრები: ”სითი პარკის” ერთწლიანი ვაუჩერი და ”ვიანორის” 50 %-იანი ფასდაკლების ბარათი.
საქართველოში ჰაერის დაბინძურების მაჩვენებელი საგანგაშოდ მაღალია, დაბინძურების გამომწვევ მიზეზებს შორის პირველი ადგილი, 71 %-ი, ავტომობილების გამონაბოლქვს უკავია.
გამონაბოლქვის მაღალი დონე კი ძირითადად განპირობებულია საქართველოს ავტოპარკის სიძველით.
უკვე ცნობილია, რომ ”ეკომეგობრული” აქცია მაისის ბოლომდე გაგრძელდება და ყოველი მეათზე დაზღვეული მიღებს პრიზს: ეკოტური ამსტერდამში 2 ადამიანზე, კლუბ 71-ის ვაუჩერი, ველოსიპედი, უიქენდი ყაზბეგში სასტუმრო ”რუმსში” და უმარავი სხვა ”ეკო პრიზი”.
”ავტოპარკის ”დაძველების” პირველი მიზეზი ცხადია არის ეკონომიკური მდგომარეობა. თუმც ჩვენნაირი ეკონომიკის ქვეყნებშიც არსებობს სტრატეგია, რომელიც მიმართულია ამგვარი პრობლემების მოგვარებისკენ - იქნება ეს შეღავათები საკანონმდებლო დონეზე მეტ-ნაკლებად ახალი მანქანებისათვის, შეღავათები დაკრედიტებაზე და სხვა. ამ ქვეყნების მაგალითზე შეიძლება ითქვას, რომ ამგვარი სტრატეგია საკმაოდ წარმატებულადაც მოქმედებს”, აღნიშნა არასამთავრობო ორგანიზაცია ”პარტნიორობა საგზაო უსაფრთხოებისთვის” დამფუძნებელმა გელა კვაშილავამ.
”ჩემი აზრით, საზოგადოებაც უფრო მეტად უნდა იყოს ინფორმირებული და მოტივირებული, რომ ეს პრობლემა მოგვარდეს. სწორედ ამიტომ ვუერთდებით ”ჯიპიაი ჰოლდინგის” ინიციატივას, წაახალისოს სხვა უწყებების თუ კერძო სექტორის მხრიდან იქნება პროცესის დასაწყისი, რომელიც აუცილებლად მიგვიყვანს შედეგამდე”- განმარტა ”საქართველოს ალიანსი უსაფრთხო გზებისთვის” გამგეობის თავმჯდომარემ ეკა ლალიაშვილმა.
