airBaltic-ის მიმართ პრეტენზიები იზრდება. როგორც ლატვიური გაზეთი Diena მომხმარებელთა უფლებების დაცვის ცენტრზე დაყრდნობით წერს, 2015 წლის აპრილში ავიაკომპანიების მისამართით საჩივრებმა იმატა. თუმცა როგორც ირკვევა, ბოლო პერიოდში ყველაზე მეტი საჩივარი ლატვიური ავიაკომპანია airBaltic-ის მისამართით იზრდება. მომხმარებელთა უფლებების დაცვის ცენტრში მიაჩნიათ, რომ აღნიშნულის მიზეზი არის ის, რომ რიგის აეროპორტში არც თუ ისე ბევრი ავიაკომპანია მუშაობს.
”დღეს ბევრი უჩივის იმას, რომ airBaltic-ი ხშირად ცვლის რეისების დროს და ხშირად იცვლება გრაფიკი”, აცხადებს ცენტრის წარმომადგენელი.
airBaltic-ში კი განმარტავენ, რომ რეისების ცვლილება ეს ავიაციაში ხშირად ხდება და აცხადებენ, რომ airBaltic-ი მსოფლიოს მასშტაბით პუნქტუალურობით ცნობილი ავიაკომპანიაა.
”ჩვენ მსოფლიოში ყველაზე პუნქტუალური ავიაკომპანია ვართ და ხალხიც ამას მიეჩვია. და იმ იშვიათ შემთხვევას, როცა რეისი დროულად ვერ სრულდება, მგზავრები უარყოფითად იღებენ”, - აცხადებენ ავიაკომპანიაში.
