21-23 აპრილს, ბელარუსის პრეზიდენტის ალექსანდრე ლუკაშენკოს სახელმწიფო ვიზიტის ფარგლებში, თბილისს ბელარუსიის ბიზნეს-დელეგაცია ეწვევა, რომელსაც ქვეყნის ვიცე-პრემიერი უხელმძღვანელებს.
სავაჭრო-სამრეწველო პალატის ინფორმაციით, 22 აპრილს სასტუმრო „თბილისი მარიოტში“ გაიმართება საქართველო-ბელარუსიის ბიზნეს-ფორუმი, რომელიც ორ ქვეყანას შორის არსებული ეკონომიკურ ურთიერთობებსა და პერსპექტივებს მიეძღვნება.
ღონისძიების ფარგლებში გაიმართება ორმხრივი შეხვედრები ქართული და ბელარუსული კომპანიების წარმომადგენლებს შორის, აგრეთვე ბელარუსული კვების პროდუქციის გამოფენა-დეგუსტაცია. ფორუმს გახსნიან საქართველოსა და ბელარუსის სავაჭრო-სამრეწველო პალატების პრეზიდენტები.
ბელარუსის ბიზნეს დელეგაციის შემადგენლობაშია 38 კომპანიის 44 წარმომადგენელი შემდეგი სექტორებიდან: ენერგეტიკა, ტრანსპორტი და ლოჯისტიკა, ფართო მოხმარების ენერგომოწყობილობები, საგზაო-სამშენებლო სპეცტექიკა, ავტოსატრანსპორტო მისაბმელები, ავეჯი, მუყაო-ქაღალდის პროდუქცია, კვების პროდუქტები, ეთილის სპირტი, სპირტიანი სასმელები, კომპლექსური სასუქები, ქიმიური და ნავთობქიმიური პროდუქცია, ხორცპროდუქტები, სანიტარულ-კერამიკული ნაკეთობები, მედიკამენტები, დეზინფექციის საშუალებები, საყოფაცხოვრებო ქიმია, კაბელები, ჭურ ჭელი, სასოფლო-სამეურნეო სპეცტექნიკა, ლიზინგი.
