საპარტნიორო ფონდი მაისის ბოლოს ე.წ. სენდვიჩ პანელების პროექტს დაასრულებს და პირველ პროდუქციასაც გამოუშვებს. საწარმო რუსთავის გზატკეცილზე აშენდა და თანამედროვე იტალიური და კორეული დანადგარებით აღიჭურვა. პროდუქციის 60 პროცენტი საქართველოში გაიყიდება, ხოლო დარჩენილი ნაწილი ექსპორტზე გავა.
ე.წ. „სენდვიჩ პანელები“ ინდუსტრიული დანიშნულების შენობების მშენებლობისას გამოიყენება და რკინა-ბეტონის კონსტრუქციაზე იაფია, ხოლო მისი დამონტაჟება ნაკლებ დროს მოითხოვს და სხვა სამშენებლო მასალებთან შედარებით მოცულობაში ნაკლებია.
„სამშენებლო სექტორი ჩვენი ეკონომიკის ხერხემალია და ასეთი პროექტების ხელშეწყობით და განხორციელებით უაღრესად მნიშვნელოვან საქმეს ვაკეთებთ ეკონომიკის გაჯანსაღების და გაძლიერებისთვის,“ განაცხადა საპარტნიორო ფონდის აღმასრულებელმა დირექტორმა ირაკლი კოვზანაძემ.
საპარტნიორო ფონდი პროექტს ადგილობრივ კომპანია შპს ICES-ის ერთობლივად ახორციელებს, რისთვისაც მათ საწარმო „პანექსი“ დააფუძნეს.
ინვესტიციის მთლიანი მოცულობა 6 მლნ აშშ დოლარია.
სააქციო საზოგადოება საპარტნიორო ფონდი საქართველოს მთავრობის მიერ 2011 წელს დაარსდა. სახელმწიფო ფლობს ფონდის 100%-ს. საპარტნიორო ფონდის აქტივები 5 მილიარდ ლარს აჭარბებს. ფონდი ფლობს „საქართველოს რკინიგზის“, „საქართველოს ნავთობისა და გაზის კორპორაციის“, „საქართველოს სახელმწიფო ელექტროსისტემის“, ელექტროსისტემების კომერციული ოპერატორისა“ და ნაწილობრივ, „თელასის“ აქციებს. ფონდის ერთ-ერთი მთავარი ამოცანაა საინვესტიციო მიმართულებებთან ერთად, ამ სახელმწიფო სტრატეგიული აქციების სწორი კორპორატიული მართვა.
