თბილისში, ზაარბრიუკენის მოედანზე "მარიოტის" ქსელის მესამე სასტუმრო გაიხსნება. 130 ნომრიანი ,,მოქსის" სასტუმროს მართვის შესახებ ხელშეკრულებას ხელი "თბილისი მარიოტში", "ჯი-ემ-თი ჯგუფსა" და "მარიოტს" შორის მოეწერა. ღონისძიებას ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი, თბილისის ვიცე-მერი დიმიტრი ქუმსიშვილი და საქართველოში აშშ-ის ელჩი რიჩარდ ნორლანდი ესწრებოდნენ.
"ჯი-ემ-თი ჯგუფის“ ახალი პროექტი, მარიოტის ქსელის უახლესი ეკონომსეგმენტის ბრენდი - ,,მოქსი,, (MOXY) გათვლილია საშუალო და დაბალბიუჯეტიან მომხმარებლებზე. 130 ნომრიან სასტუმროში ასევე განთავსებული იქნება საოფისე ფართი, რომელსაც შენობის გარკვეული ნაწილი დაეთმობა, სავაჭრო სივრცე და ფუნიკულიორის კომპლექსში არსებული კაფე "პური გულიანისა" და ქართული რესტორნის "ჩელას" ფილიალები.
ვიცე-პრემიერის, ეკონომიკისა და მდგრადი განვითარების მინისტრის განცხადებით, ძალიან მნიშვნელოვანია, რომ "მარიოტის" ბრენდმა უკვე მესამე სასტუმროს მშენებლობა დაანონსა. მისი თქმით, ეს იქნება ახალი "მოქსის" ბრენდი, რომელიც "მარიოტის" ქვებრენდია.
,,მტკვრის მარცხენა სანაპიროზე, ზაარბრიუკენის, ყოფილი ვორონცოვის მოედანზე ძალიან მნიშვნელოვანი ტურისტული ობიექტი აშენდება, რომელიც საქართველოში კიდევ უფრო მეტ ტურისტს მოიზიდავს. ეს იქნება 25 მილიონ დოლარიანი ახალი ინვესტიცია. მოხარული ვარ, რომ ,,მარიოტი“, რომელიც საქართველოში თითქმის 15 წელია წარმატებით ოპერირებს, გაფართოებაზე ფიქრობს და ახალ ინვესტიციებს ახორციელებს. ამ სასტუმროს მშენებლობაში მონაწილეობას მიიღებს ასევე ამერიკის სამთავრობო სააგენტო "ოპიკი", რაც კიდევ ერთხელ ადასტურებს საქართველოში ბიზნესის განვითარებისთვის ყველანაირად ხელსაყრელი გარემოს არსებობას", - განაცხადა გიორგი კვირიკაშვილმა.
პროექტის მთლიანი ღირებულება 25 მლნ აშშ დოლარს შეადგენს და მის განხორციელებაში მონაწილეობენ აშშ-ის სამთავრობო სააგენტო "ოპიკი", რომელიც პროექტს 18 მილიონი დოლარით აფინანსებს.
საქართველოში შეერთებული შტატების ელჩის, რიჩარდ ნორლანდის განცხადებით, ,,მოქსი" ხელს შეუწყობს ტურისტების ნაკადის გაზრდას როგორც ამერიკიდან, ასევე ევროპიდან.
,, დღეს საქართველოსთვის ნამდვილად კარგი დღეა. ჩვენი ერთ-ერთი მნიშვნელოვანი სასტუმროების ქსელის ჯგუფი "მარიოტი" ქართულ კომპანია GMT -სთან თანამშრომლობის შედეგად თბილისში, მტკვრის მარცხენა სანაპიროზე, ახალი, "მოქსის" სასტუმროს გახსნას აანონსებს. ეს ხელს შეუწყობს ტურისტების ნაკადის ზრდას როგორც ამერიკიდან, ასევე ევროპული ქვეყნებიდან", - განაცხადა ელჩმა.
თბილისის ვიცე-მერი დიმიტრი ქუმსიშვილი, "მოქსის" მშენებლობას დედაქალაქისთვის მნიშვნელოვან ფაქტად მიიჩნევს.
"მინდა, მივულოცო "GMT ჯგუფს" და ჩვენს ქალაქს ახალი ბრენდის შემოსვლა. "მოქსი" არის "მარიოტის" ერთ-ერთი მიმართულება, შესაბამისად არის ზუსტად ის, რაც ჩვენი ქალაქისთვის ძალიან მნიშვნელოვანია და დადასტურებულია კვლევით. ეს არის საშუალო სპექტრზე გათვლილი სასტუმრო, რომელიც იქნება 130 ნომრიანი", - განაცხადა ქუმსიშვილმა.
სასტუმრო ,,მოქსის“ მშენებლობა 2017 წლისთვის დასრულდება. თბილისში დაგეგმილი პროექტი აღმოსავლეთ ევროპის მასშტაბით პირველი იქნება. „მოქსის“ პირველი სასტუმრო გასული წლის სექტემბერში მილანში გაიხსნა.
