საქართველოდ ვიცე-პრემიერი, ეკონომიკისა და მდგრადი განვითარების მინისტრი ხვალ, 14 აპრილს აზერბაიჯანს ეწვევა.
აზერბაიჯანული მედიის ინფორმაციით, აზერბაჯანში ვიზიტისას გიორგი კვირიკაშვილი აზერბაიჯანის ტრანსპორტის მინისტრს ზია მამედოვს შეხვდება. აზერბაიჯანული მედიის ინფორმაციითვე, გიორგი კვირიკაშვილის ბაქოში ვიზიტის მთავარი მიზანი ბაქო-თბილისი-ყარსის სარკინიგზო მაგისტრალის პროექტის ტექნიკური დეტალების გარკვევაა. მხარეები შეხვედრაზე სხვა ერთობლივ პროექტებზეც იმსჯელებენ.
ბაქო-თბილისი-ყარსის რკინიგზა რეგიონის ყველაზე მნიშვნელოვან პროექტად არის დასახელებული. უკანასკნელი ორი წლის განმავლობაში საქართველოს, აზერბაიჯანსა და თურქეთს შორის გამართულ სხვადასხვა დონის შეხვედრებზე აქტიურად განიხილებოდა საკითხი იმის შესახებ, რომ 2014 წლის ბოლოს ქართულ მონაკვეთზე უნდა გაევლო პირველ სატესტო მატარებელს.
დათქმული ვადების შესაბამისად, შპს "მარაბდა-კარწახის რკინიგზამ“ ლიანდაგის დაგება მთელ მონაკვეთზე დაასრულა.
ახალ რკინიგზას წელიწადში მილიონი მგზავრის გადაყვანისა და, პირველ ეტაპზე, 5 მილიონი ტონა ტვირთის გატარების პოტენციალი ექნება. სატვირთო მოცულობა მუდმივად გაიზრდება და მეორე ეტაპისთვის წელიწადში 15 მილიონი ტონა ტვირთის გადაზიდვა იგეგმება. აღსანიშნავია, რომ რკინიგზის ამოქმედების შემდეგ 2500 ადამიანი დასაქმდება.
