აჭარის მთავრობა დამატებითი ინვესტიციების შემოსვლას ბათუმში გმირთა ხეივნის ტერიტორიის განაშენიანებით ელოდება. როგორც ირკვევა, გმირთა ხეივნის ტერიტორიის ფართობი, საუბარია 3 ჰექტარზე 14 საინვესტიციო მიწის ნაკვეთად არის დაყოფილი, რომლის ათვისება 2 ეტაპად განხორციელდება. კონცეფციის მიხედვით, ტერიტორიაზე შენობის მაქსიმალური სიმაღლე 140 მეტრით, ხოლო მინიმალური 30 მეტრით განისაზღვრა. ტერიტორიაზე სასტუმროების, აპარტამენტების, რესტორნების, სხვადასხვა გასართობი ობიექტებისა და სპორტული ცენტრების განთავსება იქნება შესაძლებელი.
როგორც აჭარის ფინანსთა და ეკონომიკის მინისტრი დავით ბალაძე აცხადებს, გმირთა ხეივნის განვითარების კონცეფციის მიზანი საინვესტიციო გარემოს გაუმჯობესება, ბიზნესის/ტურიზმის ხელშეწყობა, სამუშაო ადგილების შექმნა და ქალაქის ინფრასტრუქტურის განვითარებაა.
აღსანიშნავია, რომ ხეივნის ტერიტორიის ათვისებით რამდენიმე კომპანია უკვე დაინტერესებულია, მათ შორის ”ორბი ჯგუფი”.
