შიდა ქართლის ეკონომიკური პოტენციალის შესავლის შემდეგ, გამოიკვეთა რომ რეგიონის გაძლიერებისთვის სოფლის მეურნეობისა და საწარმოების განვითარებაა საჭირო.
როგორც დღეს გორში პროექტის ,,ძლიერი რეგიონი - ძლიერი საქართველოსთვის“ წარდგენისას პრემიერ-მინისტრმა განაცხადა, მთავრობის ეკონომიკურმა საბჭომ უკვე შეისწავლა შიდა ქართლის შესაძლებლობები - ბუნებრივი რესურსები, ეკონომიკური პოტენციალი, ადამიანური რესურსები.
”ჩვენ გვაქვს მთლიანი სურათი იმისა, თუ რა არის საჭირო ამ რეგიონის ფეხზე დასაყენებლად და გვაქვს შესაბამისი სამოქმედო გეგმა.
შიდა ქართლის შესწავლის შედეგად რეგიონის გაძლიერებისთვის გამოიკვეთა სოფლის მეურნეობისა და საწარმოების განვითარების პერსპექტივა:
შიდა ქართლს აქვს ძალიან კარგირესურსი ხილის წარმოების, ასევე ხილის ბაღების განახლების, სანერგე მეურნეობების განვითარების კუთხით.აუცილებელია თანამედროვე მაღალმარჟიანი ჯიშების ხილის მოყვანა. ძალიან პერსპექტიულია ბოსტნეულის წარმოებაში ახალი ტექნოლოგიების დანერგვა, გადამმუშავებელი წარმოების განვითარება, მესაქონლეობის განვითარება,თევზის წარმოების გაზრდა.
რაც შეეხება საწარმოთა განვითარებას, - გორს აქვს პერსპექტივა აგურის წარმოების, მოსაპირკეთებელი მასალების დამუშავების, ასევე სამკერვალო წარმოების,ტკბილეულის წარმოების, მაკულატურის გადამუშავების კუთხით.
კასპს აქვს კრამიტის, მუყაოს წარმოების, ტყავის გადამუშავების რესურსი; ქარელს - არსებული ბუნებრივი რესურსების გადამუშავების,ხაშურს კი - ავეჯისა და მინის წარმოების კუთხით”,- აღნიშნა ირაკლი ღარიბაშვილმა.
