საქართველოს საკვები ზეთის ბაზრის 8 %-იან წილს კომპანია ”ქარვა” ფლობს. კომპანია ,,ქარვა“ ყოველდღიურად სამ-ოთხ ტონა მზესუმზირის ნატურალურ ზეთს აწარმოებს. საწარმოს მენეჯმენტის განმარტებით, წარმოების მაჩვენებელი გასული წლების მაჩვენებლებთან შედარებით გაზრდილია. კომპანიაში იმედოვნებენ, რომ უახლოეს პერიოდში წარმოების კიდევ უფრო გაფართოებასა და გამოშვებული პროდუქციის ხაზის გაზრდას შეძლებენ. რაც თავის მხრივ კომპანიას როგორც შიდა ბაზრის უკეთ ათვისებაში, ასევე ექსპორტის გაფართოებაშიც დაეხმარება.
,,საწარმოში ასზე მეტი ადამიანია დასაქმებული. მათი უმრავლესობა ჩვენი მუნიციპალიტეტის მკვიდრია. გარდა ამისა, ზეთის წარმოება ადგილობრივი ნედლეულით ხდება. რა თქმა უნდა, ბუნება ყოველთვის არ გვწყალობს, მაგრამ ეს მაინც კარგი სტიმულია ფერმერული მეურნეობების განვითარებისთვის, რადგან გლეხებს შეუძლიათ მათ მიერ მოყვანილი მზესუმზირა ქარხანას ჩააბარონ და ამით რეალიზაციის პრობლემა მოაგვარონ. ასე რომ, ამ ქარხნის ჩვენი მუნიციპალიტეტის ტერიტორიაზე არსებობა ძალიან პოზიტიური ფაქტია. ადგილობრივი წარმოების წახალისება და ქართული ბაზრის სამამულო პროდუქციით გაჯერება ხომ დღევანდელი ხელისუფლების ერთ-ერთი უმთავრესი პრიორიტეტია“-აცხადებს დედოფლისწყაროს მუნიციპალიტეტის საკრებულოს თავმჯდომარე ზვიად ჯავახიშვილი, რომელმაც ”ქარვას” საწარმო მინახულა და წარმოების პროცესს გაეცნო.
აღსანიშნავია, რომ ზეთის მწარმოებელი ქარხანა, რომელიც 2005 წლიდან „ქარვას“ ბრენდის სახელით ოპერირებს, დედოფლისწყაროს მუნიციპალიტეტის სოფელ ხორნაბუჯის ტერიტორიაზეა განთავსებული. 2012 წლის შემოდგომაზე მისი უახლესი ტექნიკით გადაიარაღება და რესტრუქტურიზაცია დაიწყო. კერძოდ, შეიცვალა მანქანა-დანადგარები და დაინერგა ახალი, ევროპული ტექნოლოგიები.
