საპარლამენტო უმრავლესობის ერთ-ერთი ლიდერი თინა ხიდაშელი დარგობრივი ეკონომიკისა და ეკონომიკური პოლიტიკის კომიტეტის სხდომაზე ეროვნული ბანკის პრეზიდენტის გიორგი ქადაგიძის გამოსვლით უკმაყოფილოა. როგორც ხიდაშელმა კომიტეტის სხდომაზე განაცხადა მინიმუმ, ქადაგიძისგან რეკომენდაციები მაინც უნდა მოესმინათ შექმნილ ვითარებასთან დაკავშირებით.
,,ჩვენ მოვისმინეთ ეროვნული ბანკის პრეზიდენტის გამოსვლა, რომელიც თავს იმართლებდა ყველა იმ ბრალდებასთან დაკავშირებით რაც მის მიმართ ბოლო პერიოდის განმავლობაში გაჟღერდა. კი ბატონო, გასაგებია მან ჩათვალა საჭიროდ, რომ ამ კითხვებზე პასუხი გაეცა, მაგრამ ვერ ერთი წინადადება ვერ მოვისმინეთ იმის შესახებ რომ აქვს თუ არა რაიმე ფუნქცია ეროვნულ ბანკს არსებულ ვითარებაში, რას აპირებენ, რა გეგმა აქვთ. გავიგეთ რომ კარგად იქცევიან და მაღალი ავტორიტეტი აქვთ და სულ ასე კარგად მოიქცევიან და სულ ასეთი მაღალი ავტორიტეტი ექნებათ და ამის შენარჩუნებისთვის იზრუნებენ. ოღონდ რა გააკეთებენ კონკრეტულად იმ საკითხებთან მიმართებაში რისთვისაც დღეს ვართ შეკრებილი, რა ვალდებულები აქვს მას, როდესაც გვეუბნებიან რომ ჩვენს ყველა სისულელეებს ვლაპარაკობთ როცა ეროვნულ ბანკზე ხმას ვიღებთ, მაშინ იქნებ გვითხრათ რას აკეთებს ეროვნული ბანკი და მერე სისულელეებს აღარ ვილაპარაკებთ. არც ერთი წინადადება არ მოგვისმენია მომავალთან დაკავშირებით, თქვენს ხედვასთან, გეგმასთან დაკავშირებით. მინიმუმ რეკომენდაციები მაინც უნდა მოგვესმინა ჩემი მოკრძალებული აზრით, იმასთან დაკავშირებით რაც დღეს ქვეყანაში ხდება”, - მიმართა ხიდაშელმა ქადაგიძეს.
შეგახსენებთ, რომ ქვეყანაში არსებულ ეკონომიკურ-ფინანსურ მდგომარეობასთან დაკავშირებით, პარლამენტის დარგობრივი ეკონომიკისა და ეკონომიკური პოლიტიკის კომიტეტის სხდომაზე ეკონომიკური ბლოკის მინისტრებს დეპუტატები უსმენენ.
კომიტეტის სხდომაზე მოხსენებით წარსდგა ეროვნული ბანკის პრეზიდენტი გიორგი ქადაგიძეც.
