ოკუპირებული აფხაზეთის ხელმძღვანელობა, კერძოდ კი განათლების სამინისტრო გალის რაიონის სკოლებში მშობლიურ ენაზე სწავლების აკრძალვას არ აპირებს.
ამის შესახებ გალის რაიონის მოსახლეობას პირადად რაულ ხაჯიმბამ აცნობა.
,,ჩვენ არ ვაპირებთ თქვენთვის მშობლიურ ენაზე სწავლების აკრძალვას, თუმცა მიუღებელია იხელმძღვანელოთ იმ წიგნებით, რომელიც აფხაზეთის არსებობას უარყოფს.” - უთხრა ხაჯიმბამ გალში მასთან შესახვედრად შეკრებილ ქართველებს.
მისი თქმით, ,,აფხაზეთის კონსტიტუციის მიხედვით” აფხაზური ენა მათი სახელმწიფო ენაა, რუსულ ენაზე კი საქმეთა წარმოება მიმდინარეობს.
ამიტომ მათთვის აუცილებელია იცოდნენ აფხაზურიც და რუსულიც, ხოლო ვისაც ქართული ენის ცოდნა უნდა, შეუძლია ისიც ისწავლონ.
,,ვისაც უნდა, ისწავლოს, ზედმეტი არ იქნება. მაგრამ ჩვენ მოვალენი ვართ, ბავშვებს ჩვენი სახელმძღვანელოებით მივაღებინოთ განათლება.” - აღნიშნა ხაჯიმბამ.
მან შეკრებილებს მოუყვა, თუ როგორ აჩვენა გალის რაიონის ადმინისტრაციის ხელმძღვანელმა, თემურ ნადარაიამ ის ქართული სახელმძღვანელო, რომლითაც გალის რაიონის სკოლებში ბავშვებს ასწავლიან.
,,ამ წიგნში მოცემულია ილუსტრაცია, სადაც დახატულია რუსული დათვი, რომელიც საქართველოს და აფხაზეთს ერთმანეთისგან აშორებს და ამ ტერიტორიებს ჭამს.
ჩვენ ამ ნახატის აზრს ვერ გავიზიარებთ.
ამიტომაც არის აუცილებელი ისეთი სახელმძღვანელოები, რომლებიც აფხაზეთში გამოიცემა და რომლებშიც საქართველოს მიერ თავმოხვეული იდეოლოგია არ იქნება გატარებული.” - დაამატა ოკუპირებული აფხაზეთის პრეზიდენტმა.
