ევროკომისიის პრეზიდენტი ჟან-კლოდ იუნკერი ევროპული არმიის შექმნის იდეით გამოვიდა, რათა რუსეთმა დაინახოს, რომ ევროკავშირი თავისი ღირებულებების დაცვას სერიოზულად აპირებს.
ამის შესახებ მან გერმანულ გაზეთ ,,Die Welt”- თან ინტერვიუში ისაუბრა და აღნიშნა, რომ მარტო ნატო-ს არსებობა საკმარისი არ არის, ვინაიდან ალიანსის ზოგიერთი ქვეყანა, მაგალითად, აშშ ევროკავშირის შემადგენლობაში არ შედის.
იუნკერის თქმით, აღმოსავლეთ უკრაინის შეიარაღებულ კონფლიქტში რუსეთის მონაწილეობა იმის დასკვნის საფუძველს იძლევა, რომ ევროპული არმიის შექმნა აუცილებელია.
იუნკერის იდეას არ იზიარებს დიდი ბრიტანეთის მთავრობა.
ბრიტანეთის პრემიერის თქმით, ამა თუ იმ ქვეყნის თავდაცვისუნარიანობა ნაციონალური პრეროგატივაა და ევროკავშირის პასუხისმგებლობაში არ შედის. ამიტომ ერთიან ევროპულ არმიას არავითარი პერსპექტივა არა აქვს.
თუმცა, ევროკავშირის სხვა ქვეყნები ბრიტანეთის პოზიციას არ ეთანხმებიან და იუნკერის მოსაზრებას მხარს უჭერენ.
გერმანიის თავდაცვის მინისტრის ურსულა ფონ დერ ლეიენის განცხადებით, არ არის გამორიცხული, რომ მომავალში ევროპას თავისი არმია ჰყავდეს.
მის აზრს გერმანიის ბუნდესთაგის საგარეო საქმეთა საკითხების კომიტეტის თავმჯდომარე ნორბერტ რეტგენიც იზიარებს.
,,მოვიდა დრო, დავფიქრდეთ ერთიან ევროპულ არმიაზე.” - აცხადებს ის.
