სებ-ის პრეზიდენტის დავალებით, საქართველოში მოქმედი კომერციული ბანკები სპეციალური გეგმის შემუშავებაზე მუშაობენ, რომლის მიხედვითაც იმ მსესხებლებს, რომელთაც კრედიტი დოლარში აქვთ, ხოლო შემოსავალი ლარში, მათი ვალის რესტრუქტურიზაცია მოხდეს.
სებ-ის პრეზიდენტი კომერცილი ბანკის ხელმძღვანელებს შეხვდა და მიმდინარე მაკრო-ეკონომიკური მდგომარეობა მათთან ერთად განიხილა.
”საბანკო სექტორის წარმომადგენლებთან ერთად გავიარეთ სხვადასხვა საკითხები, მათ შორის ყველაზე მნიშვნელოვანი: როგორც შევუმსუბუქოთ ტვირთი მოსახლეობის იმ ნაწილს, რომელსაც სესხი დოლარში აქვს და შემოსავალი კი ლარში. ბანკებს დავავალე, რომ ერთი კვირის განმავლობაში წარმოადგინონ გეგმები თუ რა მიდგომები ექნებათ მათ ასეთ კლიენტებთან და ასევე იყვნენ მაქსიმალურად მოქნილები. საუბარია სესხის ვადიანობის გაგრძელებაზე და სხვა ტიპის რესტრუქტურიზაციაზე იმისათვის, რომ ყოველთვიური სესხის მომსახურების თანხა შემცირდეს, რათა რაღაცა ტიპის შვება იგრძნონ იმ ადამიანებმა, ვისაც სესხი აქვს დოლარში და შემოსავალი ლარში. ჩვენ კარგად გვესმის, რომ ეს არ არის საკითხის ფუნდამენტური მოგვარება, მაგრამ იქამდე ვიდრე სავალუტო შემოდინებები აღსდგება და ფუნდამენტური ფაქტორები გამოსწორდება, როდესაც ლარს ექნება გამყარების ტენდენცია იქამდე ეს იქნება შვება ამ ადამიანებისათვის.
ყველა ბანკი იქნება ძალიან მოქნილი, და საბოლოო შედეგს 1 კვირის შემდგომ მოგახსენებთ, რადგანაც ბანკებს ერთ კვირიანი სამუშაო ვადა მივეცი”, - აღნიშნა შეხვედრის შემდეგ გიორგი ქადაგიძემ
სებ-ის პრეზიდენტის განმარტებითვე, მიდგომა ბანკების მხრიდან იქნება ინდივიდუალური, რადგანაც ამ ყველაფრის სტანდარტიზაცია შეუძლებელია.
”საუბარია იმაზე, რომ მოსახლეობის იმ ნაწილს, ვისაც სესხი აქვს დოლარში და რომელზედაც ყველაზე მეტი უარყოფითი გავლენა იქონია ლარის კურსის გაუფასურებამ, ამ ადამიანებს ყოველთვიური გადასახადი ანუ სესხის მომსახურების გადასახადი შევუმსუბუქოთ”,- განაცხადა ქადაგიძემ.
