რუსეთისთვის უშიშროების საბჭოს მუდმივი წევრობის უფლების ჩამორთმევის შესახებ გაერო-ს კულუარებში საუბარი უკვე დაიწყეს. უფრო მეტიც, გაერთიანებული ერების ორგანიზაციაში მისი წევრობის საკითხიც ეჭვის ქვეშ დგას.
ამის შესახებ ,,ამერიკის ხმის" უკრაინულ ბიუროს გაერო-ში უკრაინის მუდმივმა წარმოამდგენელმა იური სერგეევმა განუცხადა.
,,რაც შეეხება გაერო-ს უშიშროების საბჭოს წევრობას, საუბარი არამარტო ამ საკითხს, არამედ გაერო-ს შემადგენლობაში რუსეთის ყოფნის ლეგიტიმურობასაც ეხება, ვინაიდან 1991 წელს, მისი ამ ორგანიზაციაში მიღების დროს, დადგენილი პროცედურები დაირღვა." - აღნიშნა უკრაინელმა დიპლომატმა და იქვე დასძინა, რომ გაერო-ს დღის წესრიგში ჯერ-ჯერობით ეს საკითხი მწვავედ არ დგას.
მისი თქმით, დღეისთვის უფრო აქტუალურია პრობლემა, როგორ შეუჩერონ რუსეთს უშიშროების საბჭოში უკრაინის მიერ ინიცირებულ საკითხზე ვეტოს უფლება.
შეგახსენებთ, რომ უკრაინის ხელისუფლებამ მსოფლიო თანამეგობრობისგან აღმოსავლეთ უკრაინაში სამშვიდობო მისიის გაგზავნა ითხოვა.
,,რუსეთი გაეროსა და უშიშროების საბჭოში თავისი პოზიციით ამტკიცებს იმას, რომ მინსკის ხელშეკრულებას დემონსტრაციულად არღვევს და ზურგს აქცევს მომლაპარაკებელ და ამ ხელშეკრულების გარანტორ მხარეებს. ასე გაგრძლების შემთხვევაში, მის წინააღმდეგ გაეროს წესდების 27-ე თავი ამოქმედდება, რომლის ძალითაც რუსეთი უკრაინის საკითხის განხილვისას ხმის უფლებას დაკარგავს." - განაცხადა იური სერგეევმა.
ამასთან, სერგეევის განმარტებით, საერთაშორისო საზოგადოებაში მოსკოვმა უკვე ნდობა დაკარგა და გაერთიანებული ერების ორგანიზაციაში ყველას ესმის, რომ ნებისმიერ დოკუმენტზე რუსეთის ხელმოწერა იმდენად ფასობს, რამდენადაც თავად ის ქაღალდი, რომელზეც ხელმოწერაა გაფორმებული.