ზურაბ ვაზაგაშვილის დედა ციალა ვაზაგაშვილი აცხადებს, რომ მისი შვილის საქმეზე ყველა მკვლელი დაკავებული არაა, თუმცა მას პროკურატურის იმედი აქვს.
,, „ჩემმა მეუღლემ 8 წლის წინ იცოდა თუ ვინ იყვნენ მკვლელები და ამას 8 წელიწადი იძახდა. დღეს ჩემთვის ახალი არაფერი გამოცხადებულა. ვიცოდი ვინ ჩაატარა სპეცოპერაცია და საკონტროლო გასროლა ვინ მოახდინა. ისიც ვიცოდი, რომ განზრახ მკვლელობა იყო, ჩემი შვილი საყაჩაღოდ არ მიდიოდა. ერთადერთი რაც გულზე მომეშვა ის არის, რომ საზოგადოებამ შეიტყო, რომ მკვლელი არ იყო. სხვა სიხარული არ გამაჩნია, იმიტომ რომ ჩემი ქმარი ამას ვერ მოესწრო ყველა მკვლელი არ არის დაკავებული. დალაქიშვილი, ხიზანიშვილი, ლომიძე. 10 გამომძიებელი იძიებდა ამ საქმეს, რომლებმაც გააყალბეს. ამ გაყალბებაში თედო შონიაც მონაწილეობდა. იმედი მაქვს, ყველა მკვლელს დააკავებენ, თანდათან აიყვანენ ",-განაცხადა ციალა ვაზაგაშვილმა ,,რუსთავი-2"-თან საუბარში.
ე.წ. კორტებთან ჩატარებული სპეცოპერაციის დროს მოკლული ზურაბ ვაზაგაშვილის და ალექსანდრე ხუბულოვის საქმე მთავარი პროკურატურის მიერ.
საგამოძიებო ორგანოს ინფორმაციით, აცნობეს განახლებული გამოძიების პირობებში, რომელიც მოიცავდა 150-მდე მოწმის დაკითხვას, მათ შორის ერთი მოწმე დაიკითხა საზღვარგარეთ, ათზე მეტი ექსპერტიზის და სხვა მთელი რიგი საგამოძიებო მოქმედებების ჩატარებას, პროკურატურამ გამოკვეთა ზურაბ ვაზაგაშვილის და ალექსანდრე ხუბულოვის მკვლელობის მოტივი, აღადგინა ის სურათი, რაც მოხდა 2006 წლის 02 მაისს კორტებთან ჩატარებული სპეცოპერაციის დროს და დაადგინა, რომ ზურაბ ვაზაგაშვილი და ალექსანდრე ხუბულოვი მოკლულ იქნენ შსს ცენტრალური კრიმინალური პოლიციის დეპარტამენტის დირექტორის ყოფილი მოადგილის ირაკლი ფირცხალავას ხელმძღვანელობით მომხდარი შეიარაღებული თავდასხმისას, რომელსაც ყალბად ყაჩაღობის მომზადების აღსაკვეთად ჩატარებული წარმატებული სპეცოპერაცია უწოდეს.
ხსენებულ საქმეზე, პროკურატურის მიერ სასამართლოს განჩინების საფუძველზე, განზრახ მკვლელობის, მტკიცებულებათა ფალსიფიკაციის და განზრახ უკანონო დაკავების ბრალდებებით დაკავებულ იქნა 11 პირი:შსს ცენტრალური კრიმინალური პოლიციის დეპარტამენტის დირექტორის ყოფილი მოადგილე ირაკლი ფირცხალავა;შსს ცენტრალური კრიმინალური პოლიციის დეპარტამენტის სამძებროს სამმართველოს უფროსის ყოფილი მოადგილე გიორგი ცააძე;შსს კრიმინალური პოლიციის დეპარტამენტის ყოფილი გამომძიებელი ლევან ბეროძე;შსს ქ.თბილისის შს მთავარი სამმართველოს სპეცდანიშნულების ჯგუფის ყოფილი უფროსი კახაბერ ნაკანი და მისი ყოფილი მოადგილე გიორგი გულბიანი;სპეცდანიშნულების ჯგუფის წევრები: იასონ მილაძე, ალექსანდრე ციმაკურიძე, ზურაბ ჯოხაძე, დავით ალელიშვილი, სოსო აკვეტაია და ალექსანდრე სანიკიძე.
ხოლო ერთი პირის - შსს კრიმინალური პოლიციის დეპარტამენტის ყოფილ გამომძიებელ გრიგოლ კვინიკაძის მიმართ, რომელსაც დატოვებული აქვს საქართველოს საზღვარი, გამოტანილ იქნა დადგენილება ბრალდების შესახებ.
საქმეზე გრძელდება გამოძიება, საქართველოს სსკ-ის 109-ე მუხლის „ა", „ზ" და „თ" ქვეპუნქტებით, 369-ე მუხლის მესამე ნაწილით და 147-ე მუხლის პირველი ნაწილით, რაც სასჯელის სახედ და ზომად ითვალისწინებს თავისუფლების აღკვეთას 10 დან 20 წლამდე ან უვადო თავისუფლების აღკვეთას.
