საქართველოს მთავრობამ შესაძლოა თბილისის შემოვლითი რკინიგზის პროექტი განაახლოს. როგორც ჟურნალისტებთან ეკონომიკისა და მდგრადი განვითარების მინისტრმა გიორგი კვირიკაშვილმა განაცხადა აღნიშნულ საკითხზე მთავრობა უახლოეს პერიოდში იმსჯელებს.
,,საქართველოს რკინიგზამ და ეკონომიკისა და მდგრადი განვითარების სამინისტრომ ძალიან ბერი იმუშავეს. დავასრულოთ საინჟინრო-საპროექტო სამუშაოები.უახლოეს პერიოდში საკითხი იქნება გამოტანილი მთავრობის სხდომაზე და, რა თქმა უნდა ჩვენ ყველანი განწყობილი ვართ იმისთვის, რომ ახალი მოდიფიკაციებით პროექტი განახლდეს", _განაცხადა კვირიკაშვილმა.
შეგახსენებთ, რომ 2012 წლის შემდეგ, ახალმა მთავრობამ თბილისის შემოვლითი რკინიგზის პროექტი დაიწუნა, ის შეაჩერა და მის დაკონსერვებაზეც კი საუბრობდა. თუმცა როგორც აღმოჩნდა, ხელისუფლებამ პოზიციები შეიცვალა. თბილისის შემოვლითი რკინიგზა აშენდება, განსხვავებული მოდიფიკაციებით, თუმც რა ტიპის მოდიფიკაციებზეა ეკონომიკისა და მდგრადი განვითარების მინისტრს არ დაუკონკრეტებია.
თუმცა ადრე გაცხადებული გეგმის მიხედვით, «თბილისის შემოვლითი რკინიგზის პროექტის», მიზანია თბილისის ცენტრალური ნაწილის შემოვლა ახალი სარკინიგზო ტრასის საშუალებით.
პროექტის თანახმად, სარკინიგზო ინფრასტრუქტურის თბილისის ცენტრიდან ქალაქის ჩრდილოეთ ნაწილში გადატანით სატვირთო და სამგზავრო მატარებლები აღარ გადაკვეთენ თბილისის ცენტრალურ ნაწილს.
პროექტი შეიცავს 30 კმ სიგრძის ახალი ორლიანდაგიანი სარკინიგზო ხაზის მშენებლობასა და არსებული 10 კილომეტრიანი ხაზის რეკონსტრუქციას.
ახალი ხაზი გამოეყოფა არსებულ ხაზს ზაჰესთან, გაივლის ავჭალისა და გლდანის ტერიტორიებს, თბილისის ზღვის ჩრდილოეთით მდებარე მაღლობს და შეუერთდება კახეთის არსებულ რკინიგზის ხაზს სადგურ ლილოსთან. გათვალისწინებულია კახეთის არსებული რკინიგზის ხაზის 10 კმ-იანი მონაკვეთის სადგურ ლილოსთან შეერთების წერტილიდან თბილისის მიმართულებით - გადაკეთება ორლიანდაგიან სარკინგზო ხაზად არსებული ხაზის რეაბილიტაციისა და ახალი ხაზის დამატების გზით.
პროექტი ასევე გულისხმობს სადგურ «დიდუბესა» და სადგურ «ნავთლუღს» შორის მდებარე მონაკვეთზე სარკინიგზო ინფრასტრუქტურის დემონტაჟს, რაც საერთო ჯამში, 73 ჰექტარი მიწის ნაკვეთს გამოათავისუფლებს. აღნიშნული ტერიტორია გამოყენებული იქნება ქალაქის განვითარებისთვის.
თბილისის ცენტრალური სადგური გაუქმდება, ხოლო «დიდუბისა» და «ნავთლუღის» სადგურებს რეაბილიტაცია ჩაუტარდება.
სადგური «ნავთლუღი» მოემსახურება აღმოსავლეთი მიმართულების მგზავრებს, ხოლო სადგური «დიდუბე - დასავლეთით".
