ახალი წლის დღეებში ტურისტების მოსაზიდად, აჭარის ტურიზმისა და კურორტების დეპარტამენტი სპეციალურ მარკეტინგულ ღონისძიებას ახორციელებს. პროექტი - „უპრეცედენტო ფასდაკლებების სეზონი აჭარაში" კერძო სექტორის სტიმულირებასა და არასეზონურ პერიოდში შიდა ტურისტების მოზიდვას შეუწყობს ხელს.
25 დეკემბრიდან 1 მარტამდე აჭარაში ჩამოსულ სტუმრებს შეეძლებათ 30%-დან 50%-მდე ფასდაკლებებით სარგებლობა რეგიონის ტურისტულ ობიექტებში. პროექტი მოიცავს როგორც სასტუმროებს, მათ სერვისსა და პროდუქტს, ასევე სხვადასხვა ტურისტულ ობიექტებში ფასდაკლებებს, უფასო კონცერტებსა და კულტურულ ღონისძიებებს.
ფასდაკლებების სეზონში მონაწილეობის მსურველებს შეუძლიათ იხილონ სპეციალურად შექმნილი ვებ-გვერდი: batumievents.com და ინფორმაციის მიღებასთან ერთად ისარგებლონ არსებული შემოთავაზებებით.
ფასდაკლებებთან ერთად, რეგიონში მრავალფეროვანი საახალწლო ღონისძიებებია დაგეგმილი. აჭარის მთავრობის, ბათუმის მერიისა და აჭარის ტურიზმისა და კურორტების დეპარტამენტის ორგანიზებით საახალწლო ღონისძიებები 25 დეკემბრიდან 7 იანვარმდე გაგრძელდება. 25 დეკემბრიდან ბათუმის მერია საახალწლო განწყობის შესაქმნელად დაიწყებს უაფასო კონცერტებს ევროპის მოედანზე, სადაც მოწყობილი იქნება საშობაო გამოფენა-ბაზრობა, საახალწლო ნაძვის ხე და საკონცერტო სცენა. ჩატარდება რეგიონის ფოლკლორული ანსამბლების, საბალეტო სკოლის, მუსიკალური ბენდების კონცერტები.
30 დეკემბერს საღამოს 21 საათზე ევროპის მოედანზე კონცერტს ნიაზ დიასამიძე გამართავს.
31 დეკემბერს კი გრანდიოზული საახალწლო კონცერტით ბათუმელებს ახალ წელს ნინო ქათამაძე და ნიკოლოზ რაჭველი მიულოცავენ.
საახალწლო დღეებში, ევროპის მოედანზე არსებულ სცენაზე ცოცხალი შესრულებით უფასო კონცერტებს ჩაატარებს მუსიკალური ჯგუფი ბათუმის ჯაზ-ბიგ-ბენდი, „მგზავრები", სოფო ხალვაში და სხვა ცნობილი შემსრულებლები.
