რუსეთსა და ოკუპირებული აფხაზეთის მთავრობას შორის დაგეგმილ ხელშეკრულებას, რომლის ხელმოწერა სოჭში დღეს იგეგმება, "ნაციონალური მოძრაობა ეხმიანება და საქართველოს ხელისუფლებას კონკრეტული ნაბიჯების დაუყოვნებლივ გადადგმისკენ მოუწოდებს.
ამის შესახებ "ნაციონალური მოძრაობის" ერთ-ერთმა ლიდერმა დავით ბაქრაძემ პარტიის ცენრალურ ოფისში, თანაპარტიელებთან ერთად გამართულ საგანგებო ბრიფინგზე განაცხადა.
"ეს არის გაგრძელება იმ პოლიტიკის, რომელიც ჯერ კიდევ საბჭოთა კავშირის დროს დაიწყო, აფხაზეთისა და სამაჩაბლოსათვის განსაკუთრებული სტატუსის მინიჭებით,
რომლითაც რუსეთი აპირებს სამართლებრივად ბოლომდე მიიყვანოს აფხაზეთის რეგიონის ანექსირება.
მინდა განვაცხადო, რომ დღეს ხელმოწერილ დოკუმენტს არ გააჩნია არანაირი სამართლებრივი და იურიდიული ძალა, მაგრამ მიუხედავად ამისა, საქართველოს მხრიდან აუცილებელია კონკრეტული ნაბიჯების გადადგმა, რომლითაც ჩვენ დავუპირისპირდებით დღეს მიმდინარე ანექსიის პროცესს. სამწუხაროა, მიუხედავად ძალაინ მკაფიო საფრთხეებისა, საქართველოს ხელისუფლებამ პრაქტიკულად არაფერი გააკეთა და მოუმზადებელი შეხვდა დღევანდელ დღეს. ამიტომ, ჩვენ აუცილებლად მიგვაჩნია, უახლოეს დღეებში გადაიდგას კონკრეტული ნაბიჯები, რომლითაც დავუპირისპირდებით რუსეთის ანექსიას. ამ ნაბიჯებს შორის გახლავთ, ჩვენს მიერ, პარლამენტში ინიცირებული რეზოლუციის პროექტი, რომელშიც გაწერილია კონკრეტული ნაბიჯები და პოლიტიკა ანექსიის წინააღმდეგ", - განაცხადა ბაქრაძემ.
"ნაციონალური მოძრაობის" შეფასებით, შექმნილ ვითარებაში საქართველოს ხელისუფლებამ მათ მიერ შეთავაზებული რეზოლუციის პროექტით გაწერილი სამი ნაბიჯი, დაუყოვნებლივ უნდა გადადგას და იმედს გამოთქვამენ, რომ მიმდინარე კვირაში პარლამენტი აღნიშნულ რეზოლუციას მიიღებს.
"დაუყოვნებლივ შეურთდეს საქართველო რუსეთის წინააღმდეგ დაწესებულ სანქციებს და იმუშაოს, რათა ამ სანქციების მიზეზებში მოხვდეს აფხაზეთის საკითხი. დღეს, სრულიად არაბუნებრივია, მოვითხოვოთ დასავლეთის მხარდაჭერა, მაშინ როდესაც ჩვენ თავად არ ვუჭერთ დასავლეთის სანქციებს მხარს. ასევე დაუყოვნებლივ მოვითხოვოთ გაეროს უშიშროების საბჭოს სხდომის მოწვევა, სადაც განხილული იქნება აფხაზეთის ანექსიის საკითხი და ავამოქმედოთ ბერკეტები ყველა საერთაშორისო ორგანიზაციაში, რომ მომზადდეს სარჩელები საერთაშორისო სასამართლოებში.
და მესამე გაუქმდეს ან დროში განუსაზღვრელი ვადით გაიყინოს აბაშიძე-კარასინის ფორმატი, ვინაიდან, დღეს, რუსეთთან ჩვეულებრივ რეჟიმში ურთიერთობის გაგრძელება ნიშნავს, რომ ვეგუებით და არაფრად ვაგდებთ აფხაზეთის ანექსირებას", - განაცხადა ბაქრაძემ.
