ჩემთვის დიდი პატივი იყო მემსახურა ჩემი ქვეყნისთვის საგარეო საქმეთა მინისტრის პოზიციიდან, - განაცხადა საგარეო საქმეთა უკვე ყოფილმა მინისტრმა მაია ფანჯიკიძემ საგანგებო ბრიფინგზე, სადაც მან გადადგომის შესახებ განცხადება გააკეთა.
ექს-მინისტრმა სამინისტროს მიღწევებზე ისაუბრა და აღნიშნა, რომ გასული ორი წლის განმავლობაში მისმა გუნდმა ქვეყნის საგარეო პოლიტიკურ ასპარეზზე მიაღწია შესაძლებლობების მაქსიმუმს.
"ყალბი თავმდაბლობის გარეშე ვიტყვი, რომ გასული ორი წლის განმავლობაში ჩვენმა გუნდმა ქვეყნის საგარეო პოლიტიკურ ასპარეზზე მიაღწია შესაძლებლობების მაქსიმუმს. ჩვენ მტკიცედ ვიდექით ევროპული და ევროანტლანტიკური ფასეულობების დასაცავად. მნიშვნელოვან წარმატებებს მივაღწიეთ საგარეო პოლიტიკის ყველა პრიორიტეტული მიმართულებით. შევქმენით ევროპული და ევროატლანტიკური მისწრაფებების თვისობრივად ახალი მოდელი. ხელი მოეწერა და ამოქმედდა ევროკავშირთან ასოცირების შეთანხმება. ნატომ მიიღო გადაწყვეტილება საქართველოსთან თანამშრომლობის არსებითი პაკეტის შემუშავების შესახებ. მნიშვნელოვან პროგრესს მივაღწიეთ არაღიარების პოლიტიკის მიმართულებით და ორი სახელმწიფოთი შევამცირეთ არაღიარებათა რიცხვი. გაიზარდა გაეროში რეზოლუციათა მხარდამჭერთა რაოდენობა", - განაცხადა ყოფილმა მინისტრმა.