ერთ-ერთი მიზეზი, რის გამოც თავდაცვის სამინისტროს თანამშრომლების დაკავება მოხდა, სწორედ ეს ვიზიტები იყო, - განაცხადა გადაცემა "არჩევანში" თავდაცვის ყოფილმა მინისტრმა ირაკლი ალასანიამ. მისი თქმით, ვიზიტების ფარგლებში, როგორც გერმანიასთან, ისე საფრანგეთთან ისეთ მნიშვნელოვან საკითხებზე შედგა შეთანხმება, რომელიც საქართველოს თავდაცვისუნარიანობას გაზრდის.
"გერმანიაში ვიზიტი იყო პირველი ვიზიტი ჩემი, როგორც თავდაცვის მინისტრის. ჩვენ შევთანხმდით ერთობლივ თანამშრომლობაზე - საქართველოს თავდაცვის სამინისტროს და შეიარაღებული ძალების მომავალ განვითარებაზე, შევთანხმდით, როგორ გავაგრძელებთ ერთობლივ ოპერაციებს სხვადასხვა რეგიონში და კონკრეტულად ავღანეთში 2015 წლის შემდეგ, თუმცა, მანამდე მქონდა ვიზიტი საფრანგეთში. მესამედ შევხვდი უკვე საფრანგეთის თავდაცვის მინისტრს და ძალიან მნიშვნელოვან საკითხებზე შევთანხმდით, რაც არის სახელმწიფო საიდუმლოება, მაგრამ ეს პირდაპირ უკავშირდება ჩვენი ქვეყნის თავდაცვისუნარიანობას, იმ შესაძლებლობების გაჩენას ჩვენს ქვეყანაში, რომელიც ქართულ ჯარს მისცემს შესაძლებლობას დაიცვას საკუთარი ქვეყანა, თუკი აქამდე მივა საქმე. ასე რომ, ერთ-ერთი მიზეზი, რის გამოც თავდაცვის სამინისტროს თანამშრომლების დაკავება მოხდა, სწორედ ეს ვიზიტები იყო", - განაცხადა ალასანიამ.