მთავარი პროკურატურის მიერ თავდაცვის სამინისტროს შესყიდვების სამსახურის თანამშრომლების დაკავების ფაქტზე პარლამენტის თავმჯდომარემ კომენტარი გააკეთა.
მისი განცხადებით, სამინისტროს მაღალჩინოსნების დაკავება ვერავითარ შემთხვევაში ვერ განიხილება როგორც ერთი მორიგი საქმე და იგი ძიების პროცესს და საქმის ბოლომდე მიყვანას ყურადღებით დააკვირდება.
"საქმე ეხება თავდაცვის მიმართულებას - იმ მიმართულებას, რომელიც ერთ-ერთი ყველაზე მნიშვნელოვანი, დელიკატური და მგრძნობიარე სფეროა. 2008 წლის ომის დროს ეს ის მიმართულება იყო, რომელიც ჩავარდა, როცა შეიარაღებული ძალები მობილური ტელეფონების იმედზე იყო. ამიტომ საკითხში სიცხადის შეტანა უკიდურესად მნიშვნელოვანია. ეს საქმე უბრალოდ ვერ ჩაივლის და თუ დადასტურდა, რომ კონკრეტული პირებისადმი წაყენებული ბრალდება მართალია, ამას ძალიან სერიოზული პოლიტიკური პასუხისმგებლობა უნდა მოჰყვეს ყველას მხრიდან, ვინც ამ საქმეში იყო ჩართული, ხოლო თუ დადასტურდა, რომ ბრალდება საფუძვლიანი და მართებული არ არის, მაშინ იმ ადამიანების სერიოზული პასუხისმგებლობა უნდა დადგეს, ვინც ეს საქმე წამოიწყო. დღევანდელი მდგომარეობით, ყველა შემთხვევაში ქვეყნის თავდაცვისუნარიანობას, შეიარაღებულ ძალებს და სამხედრო სფეროს სერიოზული ზიანი აქვს მიყენებული. ჩვენ ძალიან ყურადღებით უნდა მივყვეთ საქმეს ბოლომდე და როგორც პარლამენტის თავმჯდომარე ამ საკითხს ჩემს პირად საქმეთაც ვთვლი. პარლამენტი ყველა შესაძლო ბერკეტით, კანონის და კონსტიტუციის ფარგლებში ამ საქმეს ბოლომდე მიჰყვება, რათა მსგავსი რამ აღარ განმეორდეს", - განაცხადა დავით უსუფაშვილმა.
