პარლამენტის ვიცე-სპიკერი მურმან დუმბაძე პარლამენტს მიმართავს და საგარეო საქმეთა მინისტრ მაია ფანჯიკიძის თანამდებობრივი პასუხისმგებლობის საკითხის დაყენებას მოითხოვს.
როგორც "ჯი-ეიჩ-ენ" - თან საუბრისას მურმან დუმბაძე აცხადებს, საგარეო საქმეთა მინისტრმა, უშიშროების საბჭოსზე დასწრებასთან დაკავშირებით, ანტიკონსტიტუციური და დესტრუქციული განცხადება გააკეთა.
"მაი ფანჯიკიძე ამბობს რომ შესაძლებელია 28 ოქტომბერს, როდესაც უშიშროების საბჭოს სხდომა უნდა გაიმართოს, რომელიმე სახელმწიფომ ოფიციალური ვიზიტით მიიწვიოს, მაგრამ ზუსტ მისამართს არ გვეუბნება. ეს არის ანტიკონსტიტუციური და დესტრუქციული განცხადება, რომელიც საქართველოს სახელმწიფო უსაფრთხოების საკითხია. ჩვენ ვიცით, რომ უშიშროების საბჭომ საქართველოს სუვერენიტეტის საკითხი - აფხაზეთთან სამოკავშირეო ხელშეკრულების საკითხი უნდა განიხილოს. საქართველოს პარლამენტი უფლებამოსილია, რომ პრემიერ-მინისტრს მიმართოს ოფიციალურად და დააყენოს მინისტრის თანამდებობრივი პასუხისმგებლობის საკითხი, თუმცა, მე ვიცი, რომ საქართველოს პარლამენტი ამას არ გააკეთებს, იმიტომ რომ პარლამენტი დღეს ისეთივე მლიქვნელია, როგორიც გვქონია 90-იანი წლებიდან მოყოლებული", - განაცხადა დუმბაძემ.
