,,ნაცმოძრაობის" ერთ-ერთი ლიდერი გიორგი კანდელაკი თავდაცვის ყოფილი მინისტრის ბაჩო ახალაიასთან დაკავშირებით საქალაქო სასამართლოს გადაწყვეტილებას ეხმიანება და აცხადებს, რომ მოსამართლე გატყდა.
,,ბაჩო ახალაიას დღევანდელი განაჩენი ეყრდნობა მხოლოდ და მხოლოდ ღია პუტინისტისა და რუსეთის თვითლუსტრირებული აგენტის ტრისტან წითელაშვილის (სხვა ყველაფერთან ერთად, მაგალითად, ყირიმის რუსეთის მიერ ანქსიის მხარდამჭერი მიტინგის ჩამტარებლის), წამებით მოკლული დამსახურებული ოფიცრის, შალვა თათუხაშვილისთვის ამ წამების შედეგად გამოძალული და პრესკონფერენციიდან გატაცებული მოწმის გორგაძის ჩვენებების საფუძველზე. დანარჩენი რამდენიმე მოწმე უკლებლივ ყველა რამდენჯერმეა ნასამართლევი - ზოგი ყაჩაღობაზე და ზოგი ციხიდან გაქცევაზე და ა.შ.აღნიშნულის გათვალისწინებით ბევრი „ანალიზი" არ უნდა იმას რომ მოსამართლე გატყდა. მასზე ზეწოლა გააათკეცა საქმის სისუსტემ და ევროსაბჭოს რეზოლუციამ სადაც დაფიქსირდა ბაჩოს არაკონსტიტუციური წინასწარი პატიმრობიდან გათავისუფლების მოთხოვნა.კანონიერი ქურდებისა და ორგანიზებული დანაშაულის ამ ქვეყანაში დამარცხებისა და საქართველოს თავდაცვისუნარიანობის მნიშვნელოვნად გაძლიერების ავტორის პუტინისტების, გარდაცვლილი ადამიანისა და კრიმინალების ჩვენებებზე დაყრდნობით ციხეში გამოკეტვა თავისთავად წარმოადგენს ივანიშვილის რეჟიმის დიაგნოზს. კიდევ ერთხელ თვალსაჩინოდ დადასტურდა ივანიშვილის სრულიად ღია ერთობა პუტინისტებთან (და მაშასადამე საქართველოს მტრებთან) და ორგანიზებულ დანაშაულთან. ერთი სიტყვით, დიაგნოზი საბოლოოა და მკურნალობას არ ექვემდებარება", _აცხადებს კანდელაკი.
თბილისის საქალაქო სასამართლოს მოსამართლის ბესიკ ბუგიანიშვილის გადაწყვეტილებით, თავდაცვის ყოფილ მინისტრს ბაჩო ახალაის ე.წ. ნავთლუღის სპეცოპერაციის საქმეზე 7 წლითა და 6 თვით თავისუფლების აღკვეთა მიესაჯა. რაც შეეხება ამავე საქმეში სხვა ბრალდებულებს ლევან ქარდავასა და გიორგი მაზმიშვილს 11 წლიანი ხოლო მეგის ქარდავას 7 წლითა და 6 თვით პატიმრობა მიესაჯა.
შეგახსენებთ, რომ საქმე ეხება 2006 წლის 12 იანვარს ნავთლუღის ტერიტორიაზე ჩატარებულ სპეცოპერაციას, რომელსაც 3 ახალგაზრდის ლიკვიდაცია მოჰყვა. აღნიშნულ საქმეში ბრალდებულებს ლევან ქარდავასა და გიორგი მაზმიშვილს ბრალად განზრახ მკვლელობა ედებოდათ. ამ საქმეზე კიდევ ერთი ბრალდებულია კუდის ყოფილი უფროსი დათა ახალაია, რომლის საქმე ცალკეა გამოყოფილი და მასაც ასევე გაზრახ მკვლელობა ედება ბრალად.