საქართველოს საგარეო საქმეთა მინისტრი, მაია ფანჯიკიძე სამუშაო ვიზიტით იმყოფება გერმანიის ფედერაციულ რესპუბლიკაში. ვიზიტის ფარგლებში მინისტრი შეხვედრებს გამართავს გერმანიის საგარეო საქმეთა ფედერალურ მინისტრთან ფრანკ-ვალტერ შტაინმაიერთან, ასევე გერმანიის ფედერალური კანცლერის მრჩეველთან საგარეო ურთიერთობათა და უსაფრთხოების საკითხებში კრისტოფერ ჰოისგენთან.
საქართველოს საგარეო საქმეთა სამინიტროს პრესისა და ინფორმაციის დეპარტამენტის ინფორმაციით, მაია ფანჯიკიძე ასევე შეხვდება გერმანიის მრეწველთა აღმოსავლეთ ევროპის ასოციაციის პრეზიდენტს მარკუს ფელსნერს. მინისტრი ასევე მონაწილეობას მიიღებს დისკუსიაში გერმანიის საერთაშორისო და უსაფრთხოების საქმეთა ინსტიტუტში თემაზე „საქართველო ევროპულ და ევრო-ატლანტიკურ სტრუქტურებთან დაახლოების გზაზე". მაია ფანჯიკიძე სიტყვით გამოვა ასევე ფრიდრიხ ებერტის ფონდში და შეხვდება გერმანიის საერთაშორისო თანამშრომლობის საზოგადოების პრეზიდიუმის წევრს ქრისტოფ ბაიერს. მაია ფანჯიკიძე ასევე ესტუმრება ვესტერველეს სახელობის ფონდს, სადაც შეხვდება ფონდის გენერალურ მდივანს ჰანს-იუგერ ბეერფელზს.
გერმანიის ფედერაციულ რესპუბლიკაში სამუშაო ვიზიტის ფარგლებში საქართველოს საგარეო საქმეთა მინისტრი ინტერვიუებს მისცემს წამყვან გერმანულ მედიასაშუალებებს.
