"ჩვენ მკაფიოდ უნდა დავაფიქსიროთ ჩვენი პოზიცია, უნდა დავუპირისპირდეთ და დავგმოთ საქართველოს ტერიტორიების ანექსიის ლეგალიზებისკენ მიმართული ყველა ძალისხმევა. ყველა ეს მცდელობა არის ლოგიკური გაგრძელება იმისა, რასაც რუსეთი სხვა რეგიონებში, მაგალითად ყირიმში აკეთებს. ასე რომ, ერთის მხრივ, ეს არ უნდა იწვევდეს გაოცებას, და მეორეს მხრივ, არ უნდა გვაძლევდეს მოდუნების საფუძველს. ევროპა ერთსულოვანი უნდა იყოს თავის პოზიციაში და მკაფიოდ უნდა განუცხადოს რუსეთს, რომ ამგვარი ქმედება მიუღებელია და როგორი გადაწყვეტილებაც არ უნდა იქნა მიღებული, საქართველოს ოკუპირებული ტერიტორიების: სამხრეთ ოსეთისა და აფხაზეთის არაღიარებასთან დაკავშირებით ჩვენი პოზიცია იქნება მყარი და უცვლელი,"- განაცხადა ლიტვის საგარეო საქმეთა მინისტმა ლინას ლინკევიჩიუსმა ლუქსემბურგში გამართული შეხვედრის შემდეგ.
შეგახსენებთ, ლუქსემბურგში ევროკავშირის წევრი სახელმწიფოების საგარეო საქმეთა მინისტრებთან საქართველოს საგარეო უწყების ხელმძღვანელის შეხვედრა ლატვიის ინიციატივით დაიგეგმა. ლატვია 2015 წლიდან ევროკავშირის თავმჯდომარე ქვეყანაა.
ევროკავშითან თანამშრომლობის მიმდინარე და პრიორიტეტული საკითხების გარდა, ქართულმა მხარემ შეხვედრაზე ასევე ისაუბრა საქართველოში უსაფრთხოებისა და სტაბილურობის საკითხებზე. განსაკუთრებით ყურადღება გამახვილდა საქართველოს ოკუპირებულ ტერიტორიებზე, კერძოდ აფხაზეთის ოკუპირებულ რეგიონში განვითარებულ მოვლენებზე და იმ საფრთხეებზე, რასაც შეიცავს რუსეთის ფედერაციასა და საოკუპაციო რეჟიმს შორის მოკავშირეობის შესახებ შეთანხმების დოკუმენტი.