დღეს, მთავრობის ადმინისტრაციაში, პრემიერ-მინისტრ ირაკლი ღარიბაშვილის თავმჯდომარეობით საქართველოს ევროკავშირში ინტეგრაციის კომისიის 50-ე სხდომა გაიმართა. სხდომას ევროპასთან ინტეგრაციის პროცესში ჩართული ყველა სამთავრობო უწყების ხელმძღვანელი ესწრებოდა.
ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრი ალექსი პეტრიაშვილმა დამსწრეებს საქართველოსა და ევროკავშირს შორის ასოცირების შესახებ შეთანხმებისა და ასოცირების დღის წესრიგის 2014 წლის ეროვნული სამოქმედო გეგმის განხორციელების მდგომარეობაზე, ევროინტეგრაციის საკითხთა კომუნიკაციისა და ინფორმაციის შესახებ საქართველოს მთავრობის 2014-2017 წლების სტრატეგიის 2014 წლის სამოქმედო გეგმის განხორციელების მდგომარეობისა და საქართველოს მთავრობაში ევროინტეგრაციის საკითხებზე მომუშავე სტრუქტურული ერთეულებისა და მექანიზმის გაძლიერების შესახებ ინფორმაცია მიაწოდა.
ევროკავშირთან სავიზო რეჟიმის ლიბერალიზაციის სამოქმედო გეგმის (VLAP) შესრულების მდგომარეობა და სამომავლო გეგმებზე, მიმდინარე წელს საქართველო-ევროკავშირის თანამშრომლობის ფარგლებში დაგეგმილ ღონისძიებებსა და საქართველოსა და ევროკავშირს შორის ასოცირების შესახებ შეთანხმების რატიფიკაციის მდგომარეობის შესახებ ინფორმაცია სხდომის მონაწილეებმა საგარეო საქმეთა მინისტრ მაია ფანჯიკიძისგან მოისმინეს.
ცენტრალური აფრიკის რესპუბლიკაში ევროკავშირის მისიის (EUFOR CAR) მანდატის გაგრძელების საკითხზე მომხსენებით საქართველოს თავდაცვის მინისტრი ირაკლი ალასანია წარსდგა.
ევროკავშირთან ასოცირების შესახებ შეთანხმების ღრმა და ყოვლისმომცველ თავისუფალ სავაჭრო სივრცესთან დაკავშირებული ნაწილის (DCFTA) განხორციელების საკოორდინაციო უწყებათაშორისი ქვეკომისიის შექმნასა და საკონსულტაციო ჯგუფის თაობაზე საქართველოს ეკონომიკისა და მდგრადი განვითარების მინისტრის მოადგილემ მიხეილ ჯანელიძემ ისაუბრა.
