საერთაშორისო სავალუტო ფონდისა და მსოფლიო ბანკის ყოველწლიურ შეხვედრაში მონაწილეობის მისაღებად, ფინანსთა მინისტრი ნოდარ ხადური და მინისტრის მოადგილე დავით ლეჟავა ამერიკის შეერთებულ შტატებში გაემგზავრნენ.

ვიზიტის ფარგლებში, ქ.ვაშინგტონში, დაგეგმილია ფინანსთა მინისტრის მაღალი დონის ორმხრივი შეხვედრები, მათ შორის, საერთაშორისო სავალუტო ფონდის განმკარგულებელი დირექტორის მოადგილესთან, მინ ჟუსთან (Min Zhu), სსფ-ს აღმასრულებელ დირექტორთან მენო შნელთან (Menno Snel), სსფ-ის შუა აღმოსავლეთისა და ცენტრალური აზიის დეპარტამენტის დირექტორთან, მასუდ აჰმედთან (Masood Ahmed), აგრეთვე, მსოფლიო ბანკის აღმასრულებელ დირექტორთან ფრანკ ჰემსკერკთან (Frank Heemskerk), ევროპისა და ცენტრალური აზიის მიმართულებით მსოფლიო ბანკის ვიცე-პრეზიდენტთან, ლორა ტაკთან (Laura Tuck), საერთაშორისო სავალუტო ფონდის კვლევების განყოფილების დირექტორთან და მთავარ ეკონომისტთან, ოლივიე ბლანშართან (Olivier Jean Blanchard), იაპონიის საერთაშორისო თანამშრომლობის სააგენტოს (JICA) ვიცე-პრეზიდენტთან, კიოში კოდერასთან (Kiyoshi Kodera) ევროპის საინვესტიციო ბანკის ვიცე-პრეზიდენტთან, ვილჰელმ მოლტერერთან (Wilhelm Molterer).

ამასთან, იგეგმება საქართველოს ფინანსთა მინისტრის შეხვედრა უკრაინელ კოლეგასთან, უკრაინის ფინანსთა მინისტრთან, ალექსანდრ შლაპაკთან (Oleksandr Shlapak).

ასევე, დაგეგმილია შეხვედრები ინვესტორებთან და სარეიტინგო კომპანიების წარმომადგენლებთან.