„საქართველო-აშშ-ის ურთიერთობას შესაძლო სკანდალი ემუქრება: ელჩმა რიჩარდ ნულანდმა საჯაროდ უსაყვედურა პრეზიდენტ გიორგი მარგველაშვილს, რომ ხელისუფლება ძალიან დიდ დროს უთმობს მიხეილ სააკაშვილისა და მის თანაგუნდელთა სამართლებრივ დევნას იმის ნაცვლად, რომ ქვეყნის განვითარებაზე იფიქროს", - ნათქვამია „კომერსანტის" პუბლიკაციაში.
დიპლომატიური საყვედური აშშ-ის სავაჭრო პალატის სახელით გამართულ ოფიციალური სადილის დროს გაჟღერდა, სადაც ამერიკელი დიპლომატის პრეზიდენტი ერთად ისხდნენ ბიზნესმენების გვერდით. რიჩარდ ნულანდმა სიტყვა ითხოვა და გიორგი მარგველაშვილს შეეკითხა: „ძალიან მაინტერესებს, რას უპასუხებთ აშშ-ში ვიზიტის დროს ამერიკელი სკეპტიკოსების შეკითხვას, რომლებიც დარწმუნებულნი არიან, რომ საქართველოს აკვიატებული აქვს წარსულის [ქექვა] და არა მომავალზე ზრუნვა"? - „ჩვენ, რა თქმა უნდა, მკაცრი გამოწვევის წინაშე ვდგავართ, - უთხრა პრეზიდენტმა ელჩს, - ჩვენი ამერიკელი მეგობრები ძალიან არიან შეწუხებულები ყოფილი ჩინოვნიკების დევნით... მაგრამ მე გამოვრიცხავ ვუკარნახო სასამართლოს და გამოძიებას, როგორ უნდა მოიქცეს... ეს ყოფილი ხელისუფლების წარმომადგენლების მიმართ პოლიტიკური ვენდეტა ნამდვილად არ არის", - აღნიშნა პრეზიდენტმა და მიანიშნა, რომ მზადაა მიხეილ სააკაშვილისა და ყოფილი ადმინისტრაციის სხვა ჩინოვნიკების შეწყალებისათვის: „მეუბნებიან, რომ ჯერ გაასამართლებენ, შემდეგ კი გადმომცემენ შესაწყალებლად". მოკლედ, პრეზიდენტმა გეგმები გახსნა.
პრეზიდენტის პასუხი ემთხვევა მმართველი კოალიციის „ქართული ოცნების" პოზიციას: ცოტა ხნით ადრე ერთ-ერთმა ლიდერმა ზვიად ძიძიგურმა განაცხადა, რომ მას მიხეილ სააკაშვილის გასამართლება სურს („სამართალმა რომ იზეიმოს"), თუმცა დაეთანხმება იმას, „თუ ამჟამინდელი პრეზიდენტი ყოფილ პრეზიდენტს შეიწყალებს".
მმართველ კოალიციაში ამერიკელი ელჩის სიტყვებს მშვიდად შეხვდნენ: „სიმკაცრის მიუხედავად, შეკითხვა მაინც მეგობრული იყო, - განაცხადა „კომერსანტთან" საუბარში „ქართული ოცნების" ერთ-ერთმა ლიდერმა ზაქარია ქუცნაშვილმა, - ელჩმა, უბრალოდ, ჩვენი პრეზიდენტი წინასწარ გააფრთხილა, რა შეკითხვები ელოდება მას ვაშინგტონში ვიზიტის დროს". ექს-პრეზიდენტის მომხრეები კი ხელისუფლებას ურჩევენ, რომ თავს ნუ დაიმშვიდებენ. „ნაციონალთა" წარმომადგენელმა დავით დარჩიაშვილმა „კომერსანტს" განუმარტა, რომ „ყოველთვის ფრთხილმა რიჩარდ ნულანდმა ხელისუფლებას მიანიშნა, რომ პოლიტიზებული სასამართლო პროცესები უარყოფითად იმოქმედებს საქართველო-აშშ-ის ურთიერთობაზე".
როგორც ყოფილმა საგარეო საქმეთა მინისტრმა ირაკლი მენაღარიშვილმა აღნიშნა „კომერსანტთან" საუბრის დროს, „ამერიკელი ელჩები ასე საჯაროდ პრეზიდენტ ედუარდ შევარდნაძეს არასოდეს არ მიმართავდნენ ხოლმე... მსგავსი საკითხები დახურულ კარსმიღმა წყდებოდა". პოლიტოლოგმა სოსო ცისკარიშვილმა კი განმარტა: „ეს დემარში ვაშინგტონის უკმაყოფილების გამოხატულებაა იმ მიზეზით, რომ თბილისს ჯიუტად არ ესმის თხოვნა მიხეილ სააკაშვილისა და მისი თანაგუნდელების დევნის შეწყვეტაზე".