6 ოქტომბერს საქართველოს საქმიანი ვიზიტით ეწვია ლიტვის რესპუბლიკის ტრანსპორტისა და კომუნიკაციების მინისტრის მოადგილე არიჯანდას შლიუპასი და ლიტვის სარკინიგზო კომპანიის სატვირთო გადაზიდვების დირექტორი ანდრეჯუს პონომარიოვასი. ვიზიტის ფარგლებში ლიტვის დელეგაცია შეხვდა საქართველოს ეკონომიკისა და მდგრადი განვითარების მინისტრის მოადგილეს ქალბატონ ნათია მიქელაძეს, სამინისტროს ტრანსპორტის პოლიტიკის დეპარტამენტის წარმომადგენლებს, სსიპ „სამოქალაქო ავიაციის სააგენტოსა" და შპს „საქართველოს გაერთიანებული აეროპორტების" ხელმძღვანელ პირებს.
შეხვედრის ფარგლებში მხარეებმა განიხილეს „ბალტიის ზღვა - შავი ზღვის მიმართულებით ტვირთების გადაზიდვების განვითარების შესახებ" შეთანხმების ფარგლებში საკონტეინერო ბლოკ-მატარებლის ,,ვიკინგის" პროექტში საქართველოს პერსპექტივები, ასევე საქართველოში მიმდინარე საზღვაო და სარკინიგზო პროექტები, რომლებიც ხელს შეუწყობენ საქართველოს მიმართულებით დამატებითი ტვირთნაკადების მოზიდვას და ქვეყნის სატრანზიტო პოტენციალის ამაღლებას. მხარეებმა ასევე ისაუბრეს საზღვაო სფეროში ორმხრივი სამთავრობათაშორისო შეთანხმების გაფორმებისა და საზღვაო სასწავლო დაწესებულებებს შორის სამომავლო თანამშრომლობის თაობაზე.
ლიტვის დელეგაცია ასევე შეხვდა საქართველოს ეკონომიკისა და მდგრადი განვითარების სამინისტროს სსიპ „საქართველოს ინოვაციების და ტექნოლოგიების სააგენტოს" თავმჯომარეს ირაკლი ქაშიბაძეს. შეხვედრაზე საქართველოსა და ლიტვის რესპუბლიკას შორის ტელეკომუნიკაციების და საინფორმაციო ტექნოლოგიების მიმართულებით ურთიერთაგების მემორანდუმის გაფორმების, მაღალსიჩქარიანი ინტერნეტის ელექტრონული მთავრობის განვითარებისა და ურთიერთანამშრომლობის სხვა საკითხები განიხილეს.
ვიზიტის ფარგლებში ლიტვის დელეგაცია სს „საქართველოს რკინიგზის" წარმომამადგენლებსაც შეხვდა. მხარეებმა „ვიკინგის" საკონტეინერო ბლოკ-მატარებლის მარშრუტის ოპტიმიზაციის საკითხებზე ისაუბრეს და დაგეგმეს კონკრეტული ღონისძიებები პროექტის შემდგომი იმპლემენტაციის მიზნით.
