აჭარაში რესტორნებში არსებულ ვითარებას „იდუმალი სტუმარი" „ამხელს". „იდუმალი სტუმარი" - ეს არის აჭარის ტურიზმის დეპარტამენტის მიერ წარმოებული სპეციალური პროგრამა, რომლის მიხედვითაც, იდუმალი სტუმრის მეშვეობით რესტორნებში არსებული ვითარების შესწავლა ხდება, რომელიც შემდგომ დეპარტამენტში გაანალიზდება, დამუშავდება და რეკომენდაციის სახით, კონკრეტულ რესტორანს გადაეგზავნება და ეცნობება.
„მიმდინარე პროექტებს წელს დავამატეთ „იდუმალი სტუმრის" პროექტიც. ანუ ხდება მიღებული ტრენინგებისა და მიღებული ცოდნის გადამოწმება იდუმალი სტუმრის საშუალებით. წლის ბოლოს კი გამოვაქვეყნებთ ინფორმაციას, ეს იქნება ზოგადი შედეგი თუ რა სიტუაციაა სარესტორნო ბიზნესში. შემდგომ კი კონკრეტულ რჩევები და რეკომენდაციები გადაეგზავნება რესტორნებს, თუმცა პროექტის ეს ნაწილი არ იქნება საჯარო და იქნება კონფენედციალური", - აცხადებს აჭარის ტურიზმის დეპარტამენტის თავმჯდომარის მოადგილე მამუკა ბერძენიშვილი.
როგორც მამუკა ბერძენიშვილის განმარტავს, ამ დროისათვის აჭარაში განთავსებულ რესტორნებში სულ 17 ათას ადგილამდეა, ანუ საუბარია 250 რესტორანზე.
„შეიძლება ითქვას, რომ სასტუმრო ნომრებთან შედარებით რესტორნებში ადგილების კუთხით უკეთესი მდგომარეობა გვაქვს. თუმცა ამას ვერ ვიტყვით ამავე რესტორნებში არსებული სერვისის შესახებ, რის გაუმჯობესებაზეც ინტენსიურად ვმუშაობთ და ამისათვის რამდენიმე პროექტს ვახორციელებთ კიდეც", - აცხადებს ბერძენიშვილი.