ფინანსთა სამინისტროს აკადემიისა და თბილისის სახელმწიფო უნივერსიტეტის სტუდენტური თვითმმართველობის ორგანიზებით, სხვადასხვა უმაღლესი სასწავლებლების სტუდენტებისთვის საქართველოს ფინანსთა მინისტრმა ნოდარ ხადურმა ლექცია გამართა. ფინანსთა მინისტრმა ახალგაზრდებს ქვეყნის სოციალურ-ეკონომიკური განვითარების სტრატეგიის „საქართველო 2020"-ის პრიორიტეტული მიმართულებები გააცნო.
ლექცია ინტერაქტიულ რეჟიმში წარიმართა. მინისტრმა უპასუხა სტუდენტების მიერ დასმულ შეკითხვებს.
დღის განმავლობაში ფინანსთა სამინისტროს აკადემიაში სამინისტროს საქმიანობის შესახებ სტუდენტებისთვის სემინარს ასევე გამართავენ ფინანსთა მინისტრის მოადგილე დავით ლეჟავა, საბიუჯეტო და საგადასახადო პოლიტიკის დეპარტამენტების ხელმძღვანელები.
აღნიშნულ ლექციათა კურსი ფინანსთა სამინისტროს აკადემიაში იმართება ახალი პროექტის „ბიზნეს სკოლა" - თემაზე: ,,საინვესტიციო გარემო, როგორც ეკონომიკური კატეგორია" ფარგლებში, რომელიც მხარდაჭერილია ივანე ჯავახიშვილის სახელობის თბილისის სახელმწიფო უნივერსიტეტის სტუდენტური თვითმმართველობისა და საქართველოში გაერო-ს წარმომადგენლობის მიერ.
პროექტის ფარგლებში დაგეგმილია საინვესტიციო გარემოსთან დაკავშირებულ თემებზე ინტენსიური ტრენინგებისა და სემინარების ჩატარება მონაწილე სტუდენტებისათვის. ტრეინინგებს გაუძღვებიან მოწვეული ექსპერტები და საჯარო/კერძო სექტორის წარმომადგენლები.
