9-11 ოქტომბერს საქართველოს სინგაპურის ბიზნეს-ფედერაციის დელეგაცია ესტუმრება. ვიზიტის ფარგლებში, 10 ოქტომბერს, სასტუმროში „Holiday Inn" გაიმართება საქართველო-სინგაპურის ბიზნეს ფორუმი, სადაც ასევე დაგეგმილია B2B შეხვედრები ქართულ და სინგაპურულ კომპანიებს შორის. სინგაპურის საქმიანი წრეების ინტერესებს წარმოადგენს ენერგეტიკა, წარმოება, ლოგისტიკა და საფინანსო სფერო.
გარდა ამისა, 10 ოქტომბერს ხელი მოეწერება ურთიერთთანამშრომლობის მემორანდუმს ქართულ კომპანია ს.ს. „ალიანს ჯგუფ ჰოლდინგსა" და სინგაპურულ საფინანსო კომპანიებს („Vector Scorecard Global(VSC) და Gauthamma International) შორის. მემორანდუმის მიზანია სინგაპურულ და ქართულ ბიზნესებს შორის თანამშრომლობის გაძლიერება პირდაპირი უცხოური ინვესტიციების მოზიდვისა და მცირე და საშუალო ბიზნესების ხელშეწყობის, მათ შორის, დაფინანსების კუთხით.
აღნიშნული ვიზიტის ორგანიზატორია სინგაპურის ბიზნეს-ფედერაცია, საქართველოს ეკონომიკისა და მდგრადი განვითარების სამინისტრო, საქართველოს მეწარმეობის განვითარების სააგენტო. ვიზიტის პარტნიორები არიან საქართველოს სავაჭრო-სამრეწველო პალატა და საქართველოს ბიზნეს-ასოციაცია.
