გერმანიის საერნაოსნო მომსახურების კომპანიის შტაბბინაში საფრანგეთისა (DSNA) და გერმანიის საერნაოსნო მომსახურების პროვაიდერებსა (DFS) და შპს „საქაერონავიგაცია"-ს შორის ურთიერთთანამშრომლობის მემორანდუმს მოეწერა ხელი. მემორანდუმის საფუძველზე მხარეებმა გამოთქვეს მზადყოფნა, რომ ერთობლივად, კონსორციუმის ფორმით მიიღონ მონაწილეობა "EUROCONTROL"-ის მიერ გამოსაცხადებელ ტენდერში, რომელიც ევროპის მასშტაბით ცენტრალიზებული სერვისების დანერგვას გულისხმობს.
აღსანიშნავია, რომ ზემოაღნიშნული სერვისის მიწოდების შედეგად კონსორციუმი მიიღებს გარკვეულ ფინანსურ სარგებელს, რომელიც გადანაწილდება კონსორციუმის წევრ კომპანიებს შორის. აქვე, შპს „საქაერონავიგაცია" ფინანსური სარგებლის გარდა, მიიღებს უდიდეს გამოცდილებას საერთაშორისო პროექტებში მონაწილეობის კუთხით, ვინაიდან ზემოთხსენებულ კომპანიებს უდიდესი ინტელექტუალური და მრავალწლიანი პრაქტიკული გამოცდილება აქვთ საერნაოსნო მომსახურების სფეროში. მიღებული გამოცდილება გამოყენებულ იქნება საქართველოში ამ მიმართულებით უმაღლესი სტანდარტების დანერგვისა და ფრენების უსაფრთხოების დონის მაქსიმალურად ამაღლების მიზნით.
ამასთან, 25 სექტემბერს ქალაქ სოფიაში გაფორმდა ასევე ურთიერთთანამშრომლობის მემორანდუმი ბულგარეთის საერნაოსნო მომსახურების პროვაიდერ BULATSA-სთან მათივე შტაბბინაში. აღნიშნული მემორანდუმის ფარგლებში, მხარეებმა დააფიქსირეს სურვილი, ითანამშრომლონ „EUROCONTROL"-ის მიერ შემუშავებული კიდევ ერთი ცენტრალიზებული სერვისის დანერგვის პროცესში. გამარჯვებულმა მხარემ უნდა უზრუნველყოს ევროპის მასშტაბით განლაგებული რადიო-სალოკაციო საშუალებების საიდენტიფიკაციო კოდით უზრუნველყოფა.
