ევროსაბჭოს რეზოლუცია მიღებულია „ნაციონალური მოძრაობის" ინტერესების გათვალისწინებით, - ასე აფასებს „გაერთიანებული დემოკრატიული მოძრაობის" ერთ-ერთი ლიდერი, გიორგი ახვლედიანი ევროპის საბჭოს მიერ მიღებულ რეზოლუციას საქართველოს შესახებ.
„ჩვენ, „გაერთიანებული დემოკრატიული მოძრაობა" ვთვლით, რომ ევროსაბჭოს რეზოლუცია მიღებული და დაწერილია „ნაციონალური მოძრაობის" ინტერესების გათვალისწინებით. დღევანდელი რეზოლუცია „ქართული ოცნების" ხელისუფლების სრული უჭკუობისა და უსუსურობის შედეგია, რადგან თვალნათლივ ჩანს, რომ ევროსაბჭოში მომუშავე სამთავრობო დელეგაცია ვერ ახერხებს აუხსნას ევროპელ დეპუტატებს, თუ რამდენად მნიშვნელოვანია სამართლიანობის აღდგენის პროცესი ქართული საზოგადოებისთვის. სამწუხაროდ, ჩვენი დელეგაცია ვერ ახერხებს დაუმტკიცოს ევროსაბჭოს, რომ არც ერთი გახმაურებული პროცესი არ არის პოლიტიზირებული", - აცხადებს ახვლედიანი.
მისი თქმით სრულიად გაუგებარია, რითია დაკავებული „ქართული ოცნების" დელეგაცია.
„ჩვენთვის კატეგორიულად მიუღებელია ევროპელი კოლეგების მხრიდან ბაჩო ახალაიას გათავისუფლებისა და სააკაშვილის საქმის მიმართ სამართლიანი სასამართლოს პრინციპების სრული დაცვით განხორციელების მოთხოვნა, რადგან ჩვენი სახელმწიფოს ძირეული ინტერესია, რომ ყველა დამნაშავემ, მიუხედავად თანამდებობისა, აგოს პასუხი კანონის წინაშე და ერთხელ და სამუდამოდ აღმოიფხვრას საქართველოში დაუსჯელობის სინდრომი.
აქვე პოზიტიურად უნდა აღინიშნოს ევროსაბჭოს რეზოლუციის მოწოდება საქართველოში საარჩევნო გარემოს გაუმჯობესების კუთხით, რაზეც ჩვენ აქამდეც არაერთგზის განგვიცხადებია. ასევე მნიშვნელოვანი და ყურადსაღებია ის ინიციატივები, რომლებიც უკავშირდება სასამართლო სისტემის დამოუკიდებლობის უზრუნველყოფას," - განაცხადა გიორგი ახვლედიანმა.
მასალის გამოყენების პირობები