„ეს ორი წელიწადი მთლიანობაში ჩემთვის ნეგატიურ განწყობებს არ აძღრავს, რომ გითხრათ, რომ რაღაც განსაკუთრებული წარმატებები არის - არა, მაგრამ წარუმატებლობა რომ არ არის ესეც უკვე წარმატებაა", _ აცხადებს სააგენტო „ჯი-ეიჩ-ენთან" საუბრისას ყოფილი სახელმწიფო მინისტრი კონფლიქტების მოგვარების საკითხებში გოგა ხაინდრავა ორი წლის განმავლობაში კონფლიქტური რეგიონების მიმართ გადადგმული ნაბიჯების შეფასებისას.
მისივე თქმით, კონფლიქტის მოგვარება უამრავი ფაქტორისგან შედგება. ზოგ ფაქტორში წინსვლა არის ზოგში - არა. ხაინდრავა აცხადებს, რომ ყველაზე რთული პრობლემა ამ ორი წლის განმავლობაში მაინც არის ის, რომ აფხაზეთისა და ცხინვალის რეგიონის ოკუპაციამ კონკრეტული სახე მიიღო.
„ყველაზე რთული პრობლემა მაინც არის ის, რომ ოკუპაციამ კონკრეტული სახე მიიღო. თუ 2008 წლის აგვისტომდე ეფემერული იყო არსებობა რუსეთისა და რუსული კონტროლი ამ რეგიონებზე ახლა კონკრეტული გახდა და პრაქტიკულად ეს ნაწილი არის რუსული სამხედრო დოქტრინის, რაც ძალიან მნიშვნელოვანია",_ ამბობს ხაინდრავა და აღნიშნავს, რომ ეს ყველაზე მეტ სირთულეს ქმნის , იმიტომ, რომ ასეთი ბაზები საქართველოს ტერიტორიაზე რუსებს საბჭოთა კავშირის შემდეგ არ ჰქონიათ.
„ვითარება რთულია, თუმცა მე ვფიქრობ, რომ ამ ორმა მშვიდობიანმა წელმა თავისთავად გარკვეული გავლენა იქონია საზოგადოებაზე. ვფიქრობ, რომ იმ კატასტროფის შემდეგ რაც აგვისტოში მოხდა, კონტაქტები საოკუპაციო ზოლს იქით და ზოლს აქეთ არსებულ საზოგადოებებს შორის გახშირდა. ვთქვათ იგივე სამედიცინო სფეროში თუ ამას ყურადღებას აქცევს ხალხი, ვაჭრობის თვალსაზრისით.
ვიმეორებ იმ კატასტოფის ფონზე რაც 2008 წელს მოხდა. თორემ, თავის დროზე ბევრად უფრო კეთილგანწყობილი ურთიერთობა იყო",_ აცხადებს ხაინდრავა და იხსენებს, რომ მისი სახელმწიფო მინისტრობის დროს კონფლიქტი პრაქტიკულად მოგვარებული იყო ცხინვალის რეგიონის მიმართულებით.
„მე რომ ამ დარგის სახელმწიფო მინისტრი ვიყავი ცხინვალის მიმართულებით კონფლიქტი პრატიკულად მოგვარებული იყო. იყო დარჩენილი ძალიან რთული თემა - ერთიანი სახელმწიფოს აღიარებისა, მაგრამ მისი მოგვარება შესაძლებელი იყო.
დღეს ვითარება ამ მხრივ რადიკალურად შეცვლილია, მაგრამ მთავარი ის არის, რომ დაპირისპირება არ არის. მოთბინება, რომლითაც ქართული საზოგადოება და ხელისუფლება მოქმედებს ძალიან მნიშვნელოვანი ფაქტორია",_ ამბობს ხაინდრავა.
ყოფილი სახელმწიფო მინისტრი მიესალმება აგრესიული რიტორიკის გაქრობას საქართველოს მხრიდან და ევროპაში ინტეგრაციის გზაზე გადადგმულ „პატარა მიღწევებს" კონფლიქტის მოგვარებისათვის მნიშვნელოვან ფაქტორად მიიჩნევს.
„პირველ რიგში, რა თქმა უნდა აგრესიული რიტორიკის გაქრობას ვგულისხმობ. გარდა ამისა პატარ-პატარა მიღწევებს ვგულისხმობ საქართველოს ევროპაში ინტეგრაციის გზაზე, რომელიც უკვე ხელშესახები და ნათელია. საერთაშორისო მხარდაჭერას და სერიოზულ პერსპექტივებს, რომლებიც გაჩნდა საქართველოსთვის როგორც ევროპის ნაწილისთვის და გარკვეულწილად ევროატლანტიკური სივრცის ნაწილისთვის. ეს რა თქმა უნდა ძალიან მიმზიდველია განსაკუთრებით აფხაზებისათვის",_ აცხადებს გოგა ხაინდრავა და დასძენს: „ეს ორი წელიწადი მთლიანობაში ჩემთვის ნეგატიურ განწყობებს არ აძღრავს, რომ გითხრათ, რომ რაღაც განსაკუთრებული წარმატებები არის - არა, მაგრამ წარუმატებლობა რომ არ არის ესეც უკვე წარმატებაა და ამ თვალსაზრისით ჩემი აზრით ეს ორიო წელიწადი უკვე წინ გადადგმული ნაბიჯია",_აცხადებს ხაინდრავა „ჯი-ეიჩ-ენთან" საუბრისას.