,,ნაცმოძრაობის" დეპუტატი ზურაბ ჭიაბერაშვილი ,,ჯი-ეიჩ-ენთან" საუბარში აცხადებს, რომ ევროსაბჭოს მიერ საქართველოს შესახებ მიღებული რეზოლუცია ასახავს იმ სამწუხარო სურათს რაც ჩვენს ქვეყანაში ხდება.
მისივე განმარტებით, ევროსაბჭოს რეზოლუცია ობიექტურია.
,,ევროპაში და საერთაშორისო ასპარეზზე საქართველოს იმიჯს აზიანებს ხელისუფლების პოლიტიკა რომელიც დამყარებულია ,,ასავალ-დასავალის" იდეოლოგიაზე და მიზნად ისახავს პოლიტიკურ ანგარიშსწორებას ოპონენტების მიმართ. Eეს არის ის რაც აზიანებს საქართველოს იმიჯსა და ეროვნულ ინტერესებს. ევროსაბჭო ვერ დახუჭავდა თვალს იმაზე რაც საქართველოში ხდება და შესაბამისად მიღებული რეზოლუცია არის ობიექტური, სამწუხარო სურათის ანარეკლი რაც საქართველოში ხდება", _განაცხადა ,,ჯი-ეიჩ-ენთან" საუბარში ჭიაბერაშვილი.
,,ნაცმოძრაობის" დეპუტატი ხელისუფლების წარმომადგენლების განცხადებებს თითქოს რეზოლუციას მხარი მხოლოდ ევროპის ,,სახალხო პარტიამ" დაუჭირა ეხმიანება და აცხადებს, რომ აღნიშნული აბსურდია.
,, ხელისუფლების წარმომადგენლებისგან ვისმენთ გაცხადებებს იმის შესახებ, თითქოს რეზოლუციის ტექსტს მხოლოდ ყველაზე დიდმა ფრაქციამ ევროპის ,,სახალხო პარტიამ" დაუჭირა მხარი, რაც არის აბსოლუტური ტყუილი. თუ კენჭისყრის შედეგებს ნახავთ აღმოაჩენთ, რომ რეზოლუციას ასევე მხარი დაუჭირა ფრაქცია ,,სოციალისტებმა" და ასევე ,,ლიბერალებმა" რომლშიც ერთიანდებიან უსუფაშვილის ,,რესპუბლიკელები" და ალასანიას ,,თავისუფალი-დემოკრატები", _აცხადებს ჭიაბერაშვილი.
შეგახსენებთ, რომ 103 მომხრე, 27 წინააღმდეგი - ევროსაბჭომ საქართველოს შესახებ რეზოლუცია მიიღო. მასში დარჩა ჩანაწერი, რომელიც ყოფილ მაღალჩინოსნებს, მათ შორის ბაჩო ახალაიას პატიმრობის ვადას და მისთვის წინასწარი პატიმრობის შეცვლას, ასევე მიხეილ სააკაშვილისა და მისი ოჯახის წევრების ქონების დაყადაღებას ეხება.
